پاکستان تحریک انصاف کے سینئر رہنما فواد چوہدری نے کہا ہے کہ جب تک نئے آرمی چیف کا کنڈکٹ نہیں دیکھ لیتے کچھ نہیں کہہ سکتے۔
تفصیلات کے مطابق نئے آرمی چیف سے متعلق یہ بیان فواد چوہدری نے ہم نیوز کے پروگرام"بریکنگ پوائنٹ ود مالک" میں خصوصی گفتگو کرتے ہوئے دیا اور کہا کہ گزشتہ چھ مہینوں میں فوج کا جو کنڈکٹ رہا ہے وہ متنازعہ ہے، ان چھ مہینوں میں فوج کے ادارےکا سیاست میں کردار اس پر بھی بہت سے سوالات ہیں،اس رول کو کوئی بھی خراج تحسین پیش نہیں کرتا۔
انہوں نے مزید کہا کہ اس کردار کو تبدیل کرنے کی ضرورت ہے، ہماری نئے آرمی چیف سے یہی توقع رہے گی کہ فوج کی عزت و وقار کی بحالی کیلئے اپنا کردار ادا کریں اورسیاست سے علیحدگی سے متعلق جو بیان آیا وہ ایک اچھا اقدام ہے ، مگر وہ نظر بھی آناچاہیے۔
خیال رہے کہ آج وزیراعظم شہباز شریف نے لیفٹیننٹ جنرل عاصم منیر کو آرمی چیف تعینات کرنے کی منظوری دیتے ہوئے سمری صدر مملکت کو ارسال کردی تھی جس پر دستخط کرتے ہوئے صدر مملکت نے نئے آرمی چیف سے ملاقات بھی کرلی ہے۔