مادی دنیا میں "برانڈز" کا بہت شوق ہوتا ہے ، نام ہوتا ہے ، لوگ مرے جاتے ہیں برانڈز کی خاطر ، جو جتنا مالدار اپنا برانڈ اتنا ہی مہنگا لیتا جاتا ہے ، جو جتنا خود کو خاص سمجھتا ہے ، اپنے لیے برانڈ بھی اتنا ہی خاص لیتا ہے ، ممتاز ہونا ہے ، مختلف دکھنا ہے ، لباس ، چال ، چلن میں کوئی نا کوئی امتیاز ضرور رکھنا ہے ، کندھے پر رومال ہو یا ماتھے پر بندیا ہو ، سب برانڈز کا اظہار ہے ،
قوموں کا رہن سہن ، تہذیب و تمدن ، سیاست و معاشرت ، اس کے لیے مذہبی و سیکولرزم کی بحث غیر ضروری ہے ، میڈیا پر دکھاوے کو تقسیم دکھائی جاتی ہے ، ہم جیسے احمق ان ہی برانڈز میں الجھے رہتے ہیں ، کیا شریعت کا پابند ہونا ، کسی بھی انسان کے مہذب ہونے کے لیے کافی ہے ؟ کیا سیکولر یا جدیدیت پر عمل پیرا کوئی بھی انسان ہر لحاظ سے کامل ہو گا ؟ ان دونوں سوالوں کا جواب نفی ہے ، نہیں ہے ، اسی لیے مذہبی و سیکولر کی تقسیم بھی بے معنی ہے ، دنیا کا رہن سہن ، طرز ، طور سب ہی بدلا گیا ، اب سوچ ، سمجھ اور رویوں میں بھی بدلاؤ ضروری ہے ، شائد ، دنیا اب ایسا نہیں سوچتی ، ہم ابھی تک ویسا ہی سوچتے ہیں ، آج سے دھائیوں قبل کی تقسیم ہی میں الجھے ہیں ،
دفتر ہے ، زمہ ہے ، کام ہے ، ذمہ داری سونپتے وقت ، کام دیتے وقت ، کسی کا حسب ، نسب ، نسل ، قبیلہ ، مذھب ، سب غیر ضروری ، آپ وقت کے پابند ہیں ؟ آپ امین ہیں ؟ آپ محنتی ہیں ؟ آپ اہل ہیں ؟ یہی سب معیار ہو گا ، نا کہ ، آپ سیکولر ہیں یا شریعت کے پابند ، آپ نمازی ہیں یا کھیل تماشوں کے شوقین ، آپ کا لباس مذہبی ہے یا چست و چپکا ہوا ، سب بیکار ، دنیا ایک دفتر ہے ، ہم پر ایک زمہ ہے ، زمہ داریوں سے عہدہ برا ہونا ہے ، کامیاب ہونا ہے ، برانڈڈ ہونا کافی نہیں ، معیاری ہونا ناگزیر ہے
ھود بھائی ، ماروی سرمد ، عاصمہ جہانگیر ایک طرف ، دوسری طرف مولانا فضل ، اشرفی ، حافظ سعید ، سب برانڈز کی لڑائی ہے ، سب کو اپنے ٹرن اوور کا خیال ہے ، نا کہ ہمارے درجہ بہ درجہ زوال پر فکرمندوں کا کوئی گروہ ، میڈیا پر الجھتے ، بپھرتے دکھتے ہیں ، میریٹ ، سیرینا ، بھوربن میں تو ایک دوسرے کو آپ جناب کہتے ہیں ، حضور ، ناچیز ، جناب ، سے کم پر مخاطب نہیں کرتے
