سابق وزیر خزانہ اور ماہر معاشیات شبر زیدی نے آئی ایم ایف پروگرام کے حوالے سے تہلکہ خیز انکشافات کرتے ہوئے کہا ہے کہ اگر حکومت کا طریقہ واردات اور حالت یہی رہی تو آئندہ 10 سالوں میں آپ کو مزید 2 اور پروگرام کرنا ہوں گے۔
اے آروائی نیوز کے پروگرام "رپورٹرز" میں خصوصی گفتگو کرتے ہوئے شبر زیدی نے کہا کہ کوئی بھی حکومت ہو جو حالات ہیں اس میں پاکستان کے فارن کرنسی کے مسائل ختم ہونے والے نہیں ہیں، امریکہ نے اگر پاکستان کو آئی ایم ایف کے ذریعے سپورٹ دلوائی ہے تو بدلے میں انہوں نے کچھ مانگا بھی ہوگا ؟ ہمارے جن لوگوں نے فیصلہ کروایا ہے وہ دباؤ میں تو آئے ہوں گے ۔
انہوں نے مزید کہا کہ آئی ایم ایف والے عمران خان سے یہ پوچھنے نہیں گئے تھےکہ آپ کیا کریں گے، بلکہ وہ یہ بتانے گئے تھے کہ آپ کو یہ کرنا ہے اگر آپ حکومت میں آئے تو، فیصلے کا اختیار مسلم لیگ ن، تحریک انصاف یا پیپلزپارٹی کے ہاتھ میں نہیں ہے، یہ آئی ایم ایف کےہاتھ میں ہے۔
شبر زیدی نے کہا کہ میری چھٹی حس یہ کہہ رہی ہے کہ الیکشن کا معاملہ تین مہینے سے آگے بڑھے گا، پاکستان کے سیاسی و عدالتی نظام میں 9 مئی کے بعد سے ایک طرح کا جمود آگیا ہے، آپ کو اس جمود کو توڑنا پڑے گا، کسی بھی طرح سے کریں مگر یہ کرنا ہوگا۔