مسلم لیگ ن نے پنجاب اسمبلی تحلیل کرنے کی مخالفت کیلئے پی ٹی آئی کے اراکین اسمبلی سے رابطے شروع کردیئے ہیں۔
خبررساں ادارے کی رپورٹ کے مطابق پاکستان مسلم لیگ کی جانب سے پی ٹی آئی کے 25 اراکین اسمبلی سے رابطےکیے جارہے ہیں، ان رابطوں میں اراکین اسمبلی کو پنجاب اسمبلی کی تحلیل کے عمران خان کے فیصلے کی مخالفت پر تیار کرنے کی کوشش کی جارہی ہے۔
رپورٹ کے مطابق ن لیگ ان اراکین اسمبلی کو پارٹی کے پنجاب کی پارلیمانی پارٹی کے اجلاس میں اسمبلی تحلیل کی مخالفت کرنے کا کہا گیا ہے، توقع کی جارہی ہے کہ 2دسمبر کو پی ٹی آئی پنجاب کی پارلیمانی پارٹی کے اجلاس میں یہ 25 اراکین عمران خان کے سامنے اسمبلی کی تحلیل کی مخالفت کریں گے۔
اسی حوالے سے گزشتہ روز پی ٹی آئی کی پانچ خواتین اراکین اسمبلی نے ن لیگ کے ایک سابق وزیر سے ملاقات بھی کی جبکہ ن لیگ دیگر اراکین کےساتھ بھی رابطے کی کوشش کررہی ہے۔
اندرونی ذرائع کا دعویٰ ہے کہ اسمبلیوں کی تحلیل کے معاملے پر پی ٹی آئی کے اندر بھی اختلافات پائے جاتے ہیں، پی ٹی آئی کی مرکزی اور پنجاب کے رہنماؤں کی اس حوالے سے رائے تقسیم ہے، پی ٹی آئی کی مرکزی قیادت فوری طور پر اسمبلیوں کی تحلیل چاہتی ہے جبکہ پنجاب کے رہنما و صوبائی وزراء جنوری یا فروری تک اس فیصلے کو موخر کرنے کے حق میں ہیں۔