الیکشن کمیشن آف پاکستان کو پاکستان تحریک انصاف کے خلاف ممنوعہ فنڈنگ کیس میں وکیل ہائر کرنے میں مشکلا ت کا سامنا کرنا پڑرہا ہے۔
تفصیلات کےمطابق الیکشن کمیشن نے اسلام آباد ہائی کورٹ میں تحریک انصاف کےخلاف فنڈنگ کے کیس میں پیروی کرنی ہے مگر ادارے کو اس معاملے میں نمائندگی کیلئے وکیل نہیں مل رہا، ذرائع کا دعویٰ ہے کہ بیشتر وکیل اس معاملے میں الیکشن کمیشن کی نمائندگی کرنے سے معذرت کرچکے ہیں۔
قانونی ماہر ابوذرسلمان نیازی نے اس حوالے سے ٹویٹر پر جاری اپنے بیان میں انکشاف کیا کہ الیکشن کمیشن کو وکیل کرنے میں مشکلات کا سامنا کرنا پڑرہا ہے، بیرسٹر سجیل شہریار ایڈووکیٹ سپریم کورٹ نے اس کیس میں الیکشن کمیشن کی نمائندگی سے انکار کیا ہے۔
ابوذر سلمان نیازی کے انکشاف پربیرسٹر سجیل شہریار نے بھی تصدیق کی اور کہا کہ مجھے فارن فنڈنگ کیس میں اسلام آباد ہائی کورٹ کے سامنے الیکشن کمیشن کی نمائندگی کا کہا گیا تھا تاہم میں نے اس پر معذرت کرلی ہے۔
