متحدہ قومی موومنٹ کے سابق سینیٹر میاں عتیق کو لاہور میں گرفتار کرلیا گیا ہے۔
خبررساں ادارے ایکسپریس نیوز کی رپورٹ کے مطابق ایم کیو ایم کے سابق سینیٹر کو لاہور کے تھانہ گجر سنگھ پولیس کی جانب سے گرفتار کیا گیا ہے، ان پر جعلی پراپرٹی دستاویزات جمع کروانے کا الزام ہے ، اس کیس میں میاں عتیق کو دیگر ملزمان کے ہمراہ اشتہاری قرار دیا گیا تھا۔
رپورٹ کے مطابق میاں عتیق کے خلاف مقدمہ جون 2021 میں راولپنڈی کے تھانہ گنج منڈی میں ضلعی انتظامیہ کی جانب سے دائر کیا گیا تھا ۔ میاں عتیق کو لاہور سے گرفتار کرنے کے بعد راولپنڈی پولیس کے حوالے کیا جائے گا جو انہیں راولپنڈی منتقل کرے گی۔
ترجمان راولپنڈی پولیس نے میاں عتیق کی گرفتاری کی تصدیق کرتے ایک بیان بھی جاری کردیا ہے جس کے مطابق پولیس قانون کی بالادستی اور میرٹ پر یقین رکھتی ہے جسے ہر صورت یقینی بنایا جائے گا۔
ترجمان راولپنڈی پولیس کے مطابق میاں عتیق کے خلاف کیس میں میرٹ پر تفتیش کرتے ہوئے مقدمہ کو یکسوئی سےحل کیا جائےگا۔
واضح رہے کہ ایم کیو ایم کے رہنما میاں عتیق مارچ 2015 میں ہونے والے سینیٹ انتخابات میں رکن ایوان بالا منتخب ہوئے تھے اور مارچ 2021 میں ریٹائر ہوئے تھے۔