ملک بھر میں بجلی کے بھاری بھرکم بلوں کے خلاف عوام کا احتجاج شدت اختیار کرگیا ہے، گلی گلی شہر شہر عوام بجلی کے بھاری بلوں کے خلاف سراپا احتجاج ہیں،نگران وزیر اطلاعات و نشریات مرتضیٰ سولنگی کا کہنا ہے کہ کسی بھی معاملے پر پرامن احتجاج عوام کا حق ہے تاہم پر تشدد حملے اور سرکاری عملوں کو نشانہ بنانے کی اجازت کسی کو نہیں ہے،نگران وفاقی وزیر اطلاعات مرتضیٰ سولنگی نے بجلی بلوں میں اضافے کے خلاف احتجاج پر سماجی رابطے کی ویب سائٹ ٹوئٹر پر لکھا کہ میں نے کل بھی کہا تھا اور آج بھی کہتا ہوں کہ صرف احتجاج، بل جلانے اور بل نہ دینے سے بجلی سستی نہیں ہو گی۔
انہوں نے کہا بجلی کے بل ادا نہ کیے تو اکثر لوگوں کے لیے اندھیرا ہو گا، فہم فراست، سمجھ بوجھ اور بہتر حکومتی اقدامات سے ہی یہ مسائل حل ہوں گے،پرامن احتجاج عوام کا حق ہے لیکن پرتشدد حملے اور سرکاری عملے پر حملے اس حق میں شامل نہیں ہیں۔
اس سے پہلے نگران وفاقی وزیر اطلاعات مرتضیٰ سولنگی نے ایک انٹرویو میں کہا تھا کابینہ اجلاس میں آج کچھ تجاویز زیر غور آئیں جن میں سے کچھ پر فیصلے کیے ہیں۔ تاہم کچھ فیصلے ایسے ہیں جن پر عملدرآمد کے لیے عالمی مالیاتی ادارے کو اعتماد میں لینا ضروری ہے،
نگران وزیر خزانہ شمشاد اختر آئی ایم ایف سے رابطے میں ہیں، پرائمری سرپلس اور سرکلر ڈیٹ کو دیکھ کر کچھ فیصلے کرنا ہوں گے۔ چند گھنٹے میں آئی ایم ایف کو آن بورڈ لے کر بجلی بلز سے متعلق فیصلہ کریں گے۔
پنجاب کے ضلع فیصل آباد کے شہر ڈجکوٹ میں بجلی کے بھاری بل کی وجہ سے 28 سالہ نوجوان نے خودکشی کرلی،پولیس حکام کے مطابق ڈجکوٹ کے محلہ صابری ٹاؤن میں 28 سالہ نوجوان حمزہ نے بجلی کا بل زیادہ آنے پر دلبرداشتہ ہوکر خودکشی کی۔
ملک کے مختلف شہروں میں گزشتہ کئی دنوں سے بجلی کے زائد بلوں کے خلاف احتجاج ہورہا ہے لیکن ریلیف کے منتظر عوام کے لیے بری خبر یہ ہے کہ بجلی کی قیمت میں مزید اضافے کا خدشہ ہے،سینٹرل پاور پرچیزنگ ایجنسی نے بجلی کی قیمت میں 2 روپے7 پیسے فی یونٹ اضافے کی درخواست کی ہے،تاجروں نے 31 اگست کو ملک گیر ہڑتال کا اعلان کردیا جبکہ جماعت اسلامی کی جانب سے 2 ستمبر کو ملک بھر میں ہڑتال کی جائے گی۔ پیپلزپارٹی نے بھی بجلی کی قیمتوں میں اضافے پر احتجاج کا اعلان کردیا۔
