وزیر اعظم کی معاون خصوصی برائے سماجی تحفظ اور تخفیف غربت سینیٹر ڈاکٹر ثانیہ نشتر نے کہا کہ معروف ٹیکنالوجی کمپنی مائیکرو سافٹ کے شریک بانی اور بل اینڈ میلنڈا گیٹس فائونڈیشن (بی ایم جی ایف) کے شریک چیئرمین بل گیٹس نے "احساس پروگرام" کو اسٹیٹ آف دی آرٹ قراردیا ہے۔
تفصیلات کے مطابق کی معاون خصوصی ڈاکٹر ثانیہ نشتر نے اپنے ٹوئٹر پیغام میں کہا ہے کہ آج صبح سینیٹر ڈاکٹر ثانیہ نشتر نے بل گیٹس کو احساس کے سماجی تحفظ و تخفیف غربت کے پروگراموں پر بریفنگ دی۔
انہوں نے مزید کہا کہ بل گیٹس نے احساس میں ڈیٹا، ٹیکنالوجی اور شففایت کی مرکزی حیثیت کی بھرپور پذیرائی کی اور احساس پروگرام کو سٹیٹ آف دی آرٹ قرار دیا۔
ڈاکٹر ثانیہ نشتر نے بل گیٹس کو پاکستان کا دورہ کرنے اور ان کی سپورٹ اور احساس پروگرام کو "ایک جدید ترین پروگرام" قرار دینے کے لیے شکریہ ادا کیا۔
واضح رہے کہ معروف ٹیکنالوجی کمپنی مائیکرو سافٹ کے شریک بانی اور بل اینڈ میلنڈا گیٹس فائونڈیشن (بی ایم جی ایف) کے شریک چیئرمین بل گیٹس نے وزیراعظم عمران خان کی دعوت پر پہلی بار پاکستان کا ایک روزہ دورہ کیا، اس دوران بل گیٹس نے متعدد اداروں کا دورہ کیا اور وزیر اعظم عمران خان سمیت اہم قیادت سے ملاقات کی، بل گیٹس کو ایک تقریب میں اعزازی طور پر ہلال پاکستان ایوارڈ سے نوازا گیا، وزیراعظم عمران خان، صدر مملکت عارف علوی اور وفاقی وزرا ء بھی تقریب میں شریک تھے۔