مسلم لیگ ن انتخابات میں جیت کیلئے بلاتفریق لوگوں کو اپنی جماعت میں شامل کیے جارہی ہے ، یہ دیکھے بغیر کہ شامل ہونے والی سیاسی شخصیات کا ماضی کیسا ہے۔
تفصیلات کے مطابق بلوچستان اور پنجاب کے بعد سندھ سے سیاسی شخصیات کا ن لیگ میں شمولیت کا سلسلہ جاری ہے، پیپلزپارٹی کے سابق صوبائی وزیر اختر جدون، سردار تیغو خان نے ن لیگ میں شمولیت کا اعلان کردیا ہے جبکہ سابق رکن سندھ اسمبلی محمد علی نے جلد ن لیگ میں شمولیت کا عندیہ دیدیا ہے۔
قابل ذکر بات یہ ہے کہ سردار تیغو خان جو سندھ کے کچے کے بدنام زمانہ ڈاکو مانے جاتے ہیں بھی ن لیگ میں شامل ہوگئے ہیں،اور انہیں ن لیگ میں شامل کروانے کا کریڈٹ ن لیگ سندھ کے صدر بشیر میمن اور سابق رکن قومی اسمبلی کھیل داس کو دیا جارہا ہے۔
سردار تیغو خان نے بشیر میمن اور کھیئل داس سے ملاقات میں ن لیگ میں شمولیت کا اعلان کیا اور کہا کہ جیکب آباد کے عوام ترقی و امن چاہتے ہیں۔
خیال رہے کہ سردار تیغو خان مبینہ طور پر کچے کے بدنام زمانہ ڈاکو ہیں، ان پر کئی مقدمات درج کیے جاچکے ہیں اور ا ن پر علاقے کے ڈاکوؤں اور مجرموں کی پشت پناہی کے الزامات بھی عائد کیے جاتے رہتے ہیں۔
شکارپور میں تعینات رہنےو الے ایک سابق ایس ایس پی ڈاکٹر رضوان نے اس حوالے سےا پنی رپورٹ میں کہا تھا کہ تیغو خان تیغانی کے سندھ حکومت کے بعض وزراء کے ساتھ مبینہ طور پر قریبی تعلقات ہیں، تاہم اب تک انہیں کسی مقدمے میں سزا نہیں ہوسکی ہے۔
ماضی میں پیپلزپارٹی رہنماؤں نے تیغو خان تیغانی کا پیپلزپارٹی کے ساتھ تعلق کی خبروں کی بھی تردید کی تھی۔
