سینئر صحافی و تجزیہ کار عارف حمید بھٹی نے جان کا خطرہ پیدا ہونے پر سابق وزیراعظم عمران خان کو بیرون ملک جانے کا مشورہ دیدیا ہے۔
جی این این پر اپنے پروگرام خبر ہے میں گفتگو کرتے ہوئے عارف حمید بھٹی نے کہا کہ عمران خان کی زندگی کو بے پناہ خطرات لاحق ہیں، لہذا میں ان سے کہنا چاہوں گا کہ وہ پاکستان چھوڑ کر بیرون ملک چلے جائیں،اطلاعات ہیں کہ پنجاب حکومت لینے کیلئےوہ کچھ کیا جائے گاجو کسی بھی بدترین ملک میں نہیں ہوا۔
انہوں نے مزید کہا کہ بعض سیاسی قوتیں عمران خان کو مائنس کرنے کیلئے قانون کو مائنس کرچکی ہیں، کیا عمران خان کو راستے سے ہٹاکر ن لیگ تاحیات اقتدار حاصل کرلے گی؟
عارف حمید بھٹی نے کہا کہ عمران خان کی پرویز الہیٰ سے کوئی لڑائی نہیں ہے، رائے مختلف ہوسکتی ہے کہ اسمبلی توڑی جائے یا نا توڑی جائے مگر لڑائی نہیں ہے، مونس الہیٰ کا کہنا ہے کہ ان کی فیملی کے لوگوں کے واچ لسٹ میں نام ڈال دیئے گئے ہیں، کیا ایسا کبھی ہوا ہے کہ ایک وزیراعلی کی بیٹیوں کے نام واچ لسٹ میں ڈالے گئے ہیں، یہ وہی پرویز الہیٰ ہیں جو پرویز مشرف کے دور میں حمزہ شہباز کو بہت سی فیورز دیتے رہے ہیں۔
انہوں نے کہا کہ مخالفین کو مائنس کرنے کیلئے ماؤں بیٹیوں اور بہنوں کا احترام بھی ختم ہوگیا ہے، یہ معاشرہ معاشرہ نہیں ایک ہجوم بن چکا ہے، آئین و قانون یہاں کچھ نہیں ہے۔
سینئر تجزیہ کار نے کہا کہ پنجاب اسمبلی میں فواد چوہدری کی جماعت کے 7 لوگ انہوں نے ٹیکل کرلیے ہیں، اس معاملے میں پیپلزپارٹی اور پی ڈی ایم ناکام رہی ہے،بندے کس نے ٹیکل کیے وہ مجھے بھی نہیں پتا، اگر عوام کے منتخب نمائندے اگر اسمبلی میں اپنی مرضی سے ووٹ نہیں ڈال سکتے,
بلکہ گن پوائنٹ پر ان سے ووٹ لینا ہے تو جمہوریت کا بسترگول کردیں،2008 سے ملک میں جمہوریت قائم ہے، ان 15 سالوں میں کون سی اچھی قیادت سامنےآئی ہے، وہی نواز شریف ہیں اور وہی زرداری ہیں،ایک لیڈر بتادیں جو ن لیگ نے پیدا کیا ہو تو اس کا نام بتادیں۔
