سینیٹ اجلاس سے خطاب میں لیگی رکن قومی اسمبلی خواجہ سعد رفیق نے کہا کہ جمہوریت کی ٹانگیں ہم سب توڑتے ہیں، جب ہم جیلوں میں ڈالتے ہیں ہمیں شرم آتی ہے؟ نہیں آتی، جیل میں کوئی بھی جائے ہمیں اس پر بغلیں نہیں بجانی چاہییں۔
سعد رفیق نے سینیٹ کے اجلاس سے خطاب میں کہا کہ اپوزیشن کے ایک صاحب گرفتار ہیں میں نے ان سے متعلق ایک بھی بات نہیں کی ہمیں کسی کے جیل جانے پر خوش نہیں ہونا چاہیے۔ ہم سب ان جیلوں کو کاٹ کے آئے ہیں۔ ہمیشہ حکومت نہیں رہتی کل ہم اپوزیشن میں تھے آج حکومت میں ہیں اس سے پہلے جیلوں میں تھے۔
خواجہ سعد رفیق نے کہا کہ باری سب کی آنی ہے کیونکہ آپ نے ہمیں چور بنایا اس سے پہلے غیر مسلم بنایا آج کل ہم غدار ہیں۔ یہ غداری کے سرٹیفیکیٹ اس ملک میں سیاسی جماعتیں کبھی نہیں دیتی تھیں۔ غداری کے سرٹیفیکیٹ مارشل لاء لگانے والے دیا کرتے تھے۔
انہوں نے تحریک انصاف پر تنقید کرتے ہوئے کہا کہ یہ پہلی سیاسی جماعت ہے جو کہ غداری کے سرٹیفیکیٹ دیتی ہے۔ ہم پاکستان بنانے والوں کی اولادیں ہیں، ہم پاکستان بنانے والوں کی اولادیں ہیں ہم مہاجر ہو کر آئے تھے پاکستان میں رہنے والوں کا شکریہ کہ انہوں نے ہمیں اپنے سینوں سے لگایا۔
سعد رفیق نے یہ بھی کہا کہ اگر ہم آپ کو غدار کہیں تو ہم جمہوریت پر حملہ آور ہوں گا اور اگر آپ ہمیں غدار کہیں گے تو آپ بھی وہی غلطی کریں گے۔ ہم تو ایک دوسرے سے سلام نہیں لے سکتے، ایک دوسرے سے بات نہیں کر سکتے جو سیاست دان ڈائیلاگ نہیں کر سکتا وہ کچھ بھی ہو سکتا ہے لیکن سیاستدان نہیں ہو سکتا۔
انہوں نے یقین سے کہا کہ آپ ہمیں فارغ نہیں کر سکتے کیونکہ ہم اپنی غلطی سے فارغ ہو سکتے ہیں لیکن آپ سے ہم فارغ نہیں ہوں گے۔ پھر بھی کتنا فارغ ہو جائیں گے دو چار قدم پیچھے ہو جائیں گے۔ انہوں نے کہا کہ ہم آپ کو جیل میں نہیں ڈال سکتے کیونکہ اگر ہم یہ نہ چاہتے تو نیب قوانین میں ترامیم نہ کرتے۔
ان کا مزید کہنا تھا کہ اس ملک میں اصل بیماری ہے مارشل لاء 38 سال کے مارشل لاء پر بات کرنے کی ہمت ہے کسی میں؟ اور اس مارشل لاء کے نتیجے میں آنے والے تلچھٹ حکمران، کبھی سیدھا مارش لاء آیا اور کبھی نقاب پوش۔ آپ بھی اسی کا حصہ ہیں ، آپکا Same page پھٹا لیکن ہم نے نہیں پھاڑا۔
