بنگلہ دیش کے خلاف آخری ٹی 20 میچ میں سرفراز احمد کی مایوس کن کارکردگی پر ٹویٹر صارفین پھٹ پڑے اور سرفراز کے خلاف تنقید کرنا شروع کردی۔
تفصیلات کے مطابق بنگلہ دیش کے خلاف آخری ٹی 20 میچ میں آل راؤنڈر شعیب ملک کی جگہ ٹیم میں شامل کیے جانے والے سابق قومی کرکٹ ٹیم کے کپتان سرفراز احمد نے مایوس کن کارکردگی کا مظاہرہ کرتے ہوئے 12 گیندوں پر صرف 6 رنز بنائے۔
سرفراز احمد کی جانب سے اس سست بیٹنگ کے باعث پاکستان میچ مشکلات سے دوچار ہوگیا اور میچ آخری اوور کی آخری گیند تک سنسنی خیز صورتحال اختیار کرگیا، سرفرازاحمد 12 گیندیں ضائع کرنے کے بعد آخری اوور کی دوسری گیند پر آؤٹ ہوگئے جس کے بعد آخری گیند پر پاکستان کو جیت کیلئے 2 رنز درکار تھے ، محمد نواز نے آخری گیند پر چوکا مار کر ٹیم کو فتح دلوائی۔
ٹویٹر پر کرکٹ شائقین نے سرفراز کی اس کارکردگی کو دیکھتے ہوئے ان پر طنز و تنقید کے نشتر برسانا شروع کردیئے اور کہا کہ آج ٹیم میں شامل ہونے کے بعد بھی سرفراز نے مایوس کن کارکردگی کا مظاہرہ کیا۔
رانا عمران نے کہا کہ سرفراز کی دھواں دار بیٹنگ پر کراچی یونین آف جرنلسٹس کا مطالبہ ہے کہ انہیں مین آف دی میچ قرار دینا چاہیے، ایسی اننگز صدیوں میں کھیلی جاتی ہے۔
شیخ جاوید نامی صارف نے کہا کہ سیفی بھائی آپ نے کوئی کسر نہیں چھوڑی۔
فہیم اختر ملک نے طنز کرتے ہوئے کہا کہ سرفراز کو اس میچ میں مین آف دی میچ قرار دیا جانا چاہیے۔
مشال خان نے کہا کہ سرفراز احمد نے بنگلہ دیش کو جتوانے کی پوری کوشش کی مگر الحمداللہ پاکستان جیت گیا۔
فیاض راجہ نے کہا کہ سرفراز نے ثابت کردیا کہ وہ کبھی دھوکہ نہیں دیگا۔
ایک اور صارف نے کہا کہ سرفراز کی خوبی ہے کہ وہ میچ کو سنسنی خیز مرحلے میں داخل کرکے آؤٹ ہوجاتا ہے۔
شہزاد اسلم نے کہا کہ سرفراز سے اچھی بیٹنگ تو کامران اکمل کرلیتا ہے چانس دینا ہے تو اسے دیدو۔
قاسم گوندل نے کہا کہ سرفراز احمد کو فارغ میچ کو دلچسپ بنانے پر خراج تحسین پیش کرتے ہیں۔