سوشل میڈیا پر وزیر صحت پنجاب ڈاکٹر یاسمین راشد کے انتقال کی خبریں گردش کررہی ہیں، یاسمین راشد نے خود ہی ان خبروں کی تردید کردی ہے۔
تفصیلات کے مطابق سوشل میڈیا پلیٹ فارمز اور واٹس ایپ گروپس میں ڈاکٹر یاسمین راشد کے انتقال کی جھوٹی خبریں گردش کررہی ہیں جس کے حوالے سے انہوں نے اپنا ویڈیو بیان جاری کرکے اس خبر کی تردید کردی ہے۔
مائیکروبلاگنگ ویب سائٹ پر تحریک انصاف کے رہنما اظہر مشہوانی نے یاسمین راشد کا یہ ویڈیو بیان شیئر کیاجس میں ان کا کہنا تھا کہ میں سب کو یہ بتانا چاہتی ہوں کہ الحمداللہ میں اس وقت بالکل صحت مند ہوں اور میرے بارے میں جتنی خبریں گردش کررہی ہیں وہ غلط ہیں۔
یاسمین راشد نے ان کیلئے دعا کرنے والے اور پریشان ہونے والے لوگوں کا شکریہ بھی ادا کیا۔ اظہر مشہوانی نے یہ بیان شیئر کرتے ہوئے کہا کہ ڈاکٹر یاسمین راشد صاحبہ بالکل ٹھیک ہیں اور اس وقت اپنے حلقے میں ہیں، بغیر تصدیق خبریں چلانے سے پرہیز کریں۔
نجی ٹی وی چینل کے رپورٹر عمران محمد نے بھی اس خبر کی تردید کرتے ہوئے کہا کہ ابھی میری ڈاکٹر یاسمین راشد صاحبہ سے فون پر بات ہوئی ہے ۔۔ وہ خیر و عافیت سے ہیں۔
انہوں نے جھوٹی خبریں پھیلانے والوں سے متعلق کہا کہ اللہ پاک جھوٹوں پر لعنت فرمائے ، آمین۔