قومی اسمبلی میں قائد حزب اختلاف شہباز شریف نے وزیراعظم عمران خان کو ملک کیلئے سیکیورٹی رسک قرار دیدیا ہے۔
مائیکروبلاگنگ ویب سائٹ ٹویٹر پر مسلم لیگ ن کے صدر کی جانب سے جاری کردہ ایک بیان میں کہا گیا ہے کہ عمران نیازی اقتدار بچانے کے لئے پاکستان کو نشانے پر لے آئے ہیں،ان کی کرپشن، نالائقی اور نااہلی نے ملک کو معاشی،سماجی، خارجہ تباہی سے دوچارکیا ہے۔
شہباز شریف نے اپنے بیان میں مزید کہا کہ عمران نیازی کی تقاریر پر پابندی لگائی جائے، وہ ملک کے سفارتی تعلقات تباہ کرنے کے درپے ہیں، آج کے خطاب تک عوام اور پارلیمنٹ کو خط نہیں دکھایا گیا، صرف مندرجات بتائے جارہے ہیں۔
انہوں نے مزید کہا کہ خط نہ دکھانے کا مطلب ہے کہ کوئی خط نہیں، عمران نیازی ہمیشہ کی طرح ایک اب نیا جھوٹ بول رہے ہیں عوام انہیں اور ان کے ہر جھوٹ کو مسترد کرچکے ہیں۔
شہباز شریف نے کہا کہ کرپشن، ریاست مدینہ کے بیانیوں کے بعد اب سازشی خط کا بیانیہ لائے ہیں، ایک سفارتی کیبل کو سازش کا رنگ دے کر پیش کیا جارہا ہے، دوگھنٹے جلسے میں اور ایک گھنٹہ قوم سے خطاب میں جس خط کا ذکر کیا، وہ خط ہے ہی نہیں، اگر وزیراعظم کے خطاب اور تقاریر ختم ہوگئی ہوں تو اسمبلی میں 172 ارکان پورے کریں۔
