سابق وفاقی وزیر فواد چودھری کا کہنا ہے کہ لاہور ہائیکورٹ میں پیش کیے گئے ریکارڈ کے مطابق عمران خان پر پنجاب میں 84 جب کہ اسلام آباد میں 43 مقدمات درج ہیں۔
سماجی رابطے کی ویب سائٹ ٹوئٹر پر جاری پیغام میں رہنما تحریک انصاف فواد چودھری نے بتایا کہ چیئرمین تحریک انصاف وسابق وزیراعظم عمران خان کے خلاف بنائے گئے مقدموں کی تعداد 127 ہو گئی ہے۔ انہوں نے کہا کہ عدالت میں پیش کیےگئے ریکارڈ کے مطابق پنجاب میں 84 اور اسلام آباد میں ان کے خلاف درج مقدمات کی تعداد 43 ہے۔
فواد چودھری نے مزید کہا کہ ان مقدمات کی تعداد مزید بڑھ جائے گی کیونکہ یہ تعداد 20 مارچ تک کی ہے۔ اتنی بے شرم حکومت کی جدید دور میں مثال ملنا مشکل ہے۔
یاد رہے کہ حکومت کی جانب سے عمران خان کیخلاف مختلف الزامات میں مقدمات کے اندراج کا سلسلہ جاری ہے۔ کسی مقدمے میں توشہ خانہ کے تحائف کی چوری کا الزام ہے تو کہیں کارکنوں کو جلاؤ گھیراؤ پر اکسانے اور کہیں ریاستی اداروں کیخلاف ہرزہ سرائی پر مقدمہ بنایا گیا ہے۔
