قومی اسمبلی اجلاس کے دوران وفاقی وزیر اطلاعات فواد چوہدری اور اپوزیشن رہنما سعد رفیق کے درمیان گپ شپ سے متعلق سوشل میڈیا پر دلچسپ تبصروں کاسلسلہ جاری ہے۔
تفصیلات کے مطابق سپریم کورٹ آف پاکستان کی جانب سے قومی اسمبلی کو بحال کرنے اور عدم اعتماد پر ووٹنگ کیلئے اجلاس طلب کیے جانے کے حکم کے بعد آج قومی اسمبلی کا اجلاس جاری ہے۔
اجلاس کے دوران وقفہ میں وفاقی وزیر اطلاعات و نشریات فواد چوہدری اور ن لیگی رہنما سعد رفیق کی ایک ویڈیو سوشل میڈیا پر وائرل ہوئی جس میں دونوں قریب بیٹھ کر گفتگو کرتے دکھائی دے رہے تھے۔
پریس گیلری سے بنائی گئی اس ویڈیو میں آواز ریکارڈ نہیں ہوسکی جس سے یہ تو واضح نہیں ہوسکا کہ دونوں رہنماؤں کے درمیان کیا بات چیت ہورہی ہے تاہم سوشل میڈیا صارفین نے اس تصویر پر تبصروں میں یہ تکے لگانا شروع کردیئے ہیں کہ دونوں کن امور پر تبادلہ خیال کررہے ہیں۔
ٹویٹر پر یہ ویڈیو شیئر کرتے ہوئے ایک صارف نے سوال اٹھایا کہ دونوں میں کیا بات ہورہی ہوگی؟
اس کے جواب میں ایک صارف نے لکھا کہ فواد چوہدری سعد رفیق سے کہہ رہے ہیں کہ بٹ کی کچوریاں ذرا زیادہ منگوانا مجھے کل بھی نہیں ملی تھیں۔
ایک اور صارف نے کہا فواد چوہدری کہہ رہے ہوں گے کہ جہلم سے مجھے ٹکٹ دیدیں۔
ایک اور صارف نے کہا کہ فواد چوہدری اور سعد رفیق ایسے گپ شپ کررہے ہیں جیسے کچھ ہوا ہی نہیں جبکہ آپ ان کی وجہ سے سیاسی مخالفت میں اپنے اردگرد موجود لوگوں سے لڑرہے ہیں۔
حماد نامی صارف نے لکھا کہ سعد رفیق حکومتی بینچز پر آگئے۔
