سابق وزیراعظم عمران خان پر فیصل آباد کے بعد اٹک میں بھی ایک مقدمہ درج کرلیا گیا ہے۔
خبررساں ادارے کی رپورٹ کے مطابق اٹک کے تھانہ نیو ایئر پورٹ میں سابق وزیراعظم عمران خان اور تحریک انصاف کے دیگر رہنماؤں کے خلاف مقدمہ درج کرلیا گیا ہے۔
رپورٹ کے مطابق مقدمہ شعائر اسلام کی خلاف ورزی کی دفعات کے تحت درج کروایا گیا ہے جس میں عمران خان کے علاوہ عوامی مسلم لیگ کے سربراہ شیخ رشید، تحریک انصاف کے رہنما قاسم سوری، فواد چوہدری اور مراد سعید کو بھی نامزد کیا گیا ہے۔
یاد رہے کہ اس سے قبل عمران خان کے خلاف فیصل آباد میں شعائر اسلام کی توہین کے الزام میں مقدمہ درج کیا گیا تھا جس میں عمران خان، شیخ رشید، فواد چوہدری اور شہباز گل کے علاوہ ڈیڑھ سو سے زائد لوگوں کو نامز دکیا گیا ہے۔
دوسری جانب تھانہ مارگلہ میں سابق وزیر داخلہ شیخ رشید کے خلاف ایک مقدمہ درج کروانے کیلئے درخواست دی گئی ہے جس میں موقف اپنایا گیا ہے کہ مدینہ منورہ میں حکومتی شخصیات کے خلاف نعرے بازی کے واقعہ کی پلاننگ پاکستان میں ہوئی لہذا سابق وزیر داخلہ شیخ رشید کے خلاف مقدمہ درج کیا جائے، درخواست میں سابق وزیراعظم عمران خان کو بھی نامزد کیا گیا ہے۔
انہیں مقدمات میں سعودی عرب سے واپس آنے والے شیخ رشید کے بھتیجے اور تحریک انصاف کے رکن قومی اسمبلی راشد شفیق کو بھی اسلام آباد ایئر پورٹ سے گرفتار کرکے فیصل آباد منتقل کردیا گیا ہے۔
