گزشتہ روز عمران خان کے خلاف تحریک عدم اعتماد کی کامیابی کے بعد آج لندن میں نواز شریف کی رہائشگاہ کے باہر ہزاروں افراد مظاہرہ کررہے ہیں۔
تفصیلات کے مطابق بیرون ملک مقیم پاکستانی عمران خان کی حکومت کے خاتمے کے بعد سراپا احتجاج بن گئے ہیں، دنیا کے مختلف علاقوں سمیت لندن میں بھی پاکستانیوں نے نواز شریف کی رہائش گاہ کے باہر جمع ہوکر احتجاج کیا۔
مائیکروبلاگنگ ویب سائٹ ٹویٹر پر مظاہرے کے حوالے سے متعدد ویڈیوز بھی شیئر کی جارہی ہیں، ویڈیوز میں دیکھا جاسکتا ہے کہ مظاہرین نے پاکستان اور تحریک انصاف کے جھنڈے اٹھارکھے ہیں اور وہ نواز شریف کے خلاف نعرے بازی بھی کررہے ہیں۔
پاکستان تحریک انصاف کے آفیشل ٹویٹر ہینڈل سے بھی مظاہرے کی ویڈیوز شیئر کی گئیں اور کہا گیا کہ یہ لندن سے آئے ہوئے لوگ ہیں جو نواز شریف کے گھر کے باہر احتجاج کررہے ہیں۔
ویڈیوز میں برطانیہ میں مقیم پاکستانیوں سے اس احتجاج میں شریک ہونے کی اپیل بھی کی گئی اور کہا گیا کہ عمران خان ایک حق اور سچ کیلئے لڑرہا ہے اس کا ساتھ دیں۔
صحافی و اینکر پرسن اطہر کاظمی نے بھی یہ ویڈیوز شیئر کیں اور کہا کہ لندن میں شریف خاندان کے فلیٹس کے باہر بڑی تعداد میں اورسیز پاکستانیوں کا احتجاج جاری، شدید نعرے بازی، عمران حکومت کے خاتمے پر اورسیز پاکستانیوں کا شدید غم و غصہ کا اظہار کیا جارہا ہے۔
نواز شریف کی رہائش گاہ کے باہر ہونے والے احتجاج میں خواتین اور بچوں کی بھی بڑی تعداد نے شرکت کی۔