حکومتی اتحادی جماعت ق لیگ کو ن لیگ کی جانب سے پنجاب حکومت کے حوالے سے نئی پیشکش کردی گئی ہے تاہم ابھی تک بہت سے معاملات میں اختلاف باقی ہے۔
خبررساں ادارے کی رپورٹ کے مطابق مسلم لیگ کے ایک وفد نے پارٹی قائد نواز شریف کی جانب سے نئی پیشکش لے کر چوہدری برادران سے ملاقات کی جس میں مسلم لیگ ن کے قائد میاں نواز شریف کا پیغام ق لیگ کی قیادت کو پہنچایا گیا۔
رپورٹ کے مطابق مسلم لیگ ن کے قائد عدم اعتماد میں حمایت کے بدلے میں پنجاب کی وزارت اعلی ق لیگ کو دینے کی شرط مان گئے ہیں، جس کے مطابق عدم اعتماد کے بعد پنجاب کی وزارت اعلی آئندہ 6 ماہ کیلئے ق لیگ کو دیدی جائے گی۔
اس سے قبل مسلم لیگ ن کے صدر میاں شہباز شریف کی جانب سے 2 ماہ کیلئےوزار ت اعلی ق لیگ کو دیئے جانے کی تجویز سامنے آئی تھی جسے ق لیگ نے مسترد کردیا تھا جس کے بعد پیپلزپارٹی نے 6 ماہ کی مدت کیلئے پیپلزپارٹی نے سفارش کی جسے نواز شریف نے منظور کرلیا ہے۔
اس معاہدے کے تحت پیپلزپارٹی کے عدم اعتماد کے بعد فوری انتخابات نہ کروانے کے مطالبے کو بھی مانا گیا ہے ، یعنی عدم اعتماد کے کامیاب ہونے کے بعد پنجاب میں آئندہ 6 ماہ کیلئے ق لیگ کی حکومت ہوگی، یہ دورانیہ 6 ماہ سے بڑھ بھی سکتا ہے۔
تاہم ایک معاملے پر ابھی اختلاف برقرار ہے، ق لیگ کا مطالبہ ہے کہ عدم اعتماد پر ووٹنگ سے قبل ہی مسلم لیگ ن وزارت اعلی ق لیگ کو دینے کا اعلان کرے، جبکہ ن لیگ چاہتی ہے کہ عدم اعتماد کامیاب ہونے کے بعد یہ اعلان کیا جائے۔
ن لیگ کی جانب سے ق لیگ کو دیگر آفرز کےساتھ ساتھ قومی اسمبلی کی 8 اور صوبائی اسمبلی 20 نشستوں کی آفر بھی کیے جانے کا امکان ہے۔
