وزیراعظم کی بزنس کمیونٹی سے اپیل پر اے آر وائی نیٹ ورک کے سی ای او سلمان اقبال نے 20ہزارآمدن تک کے ملازمین کی تنخواہ بڑھانے کا اعلان کر دیا ہے۔
اے آر وائی نیٹ ورک کے سی ای او سلمان اقبال نے کہا کہ پہلے مرحلے میں 20 ہزار روپے آمدن تک والے ملازمین کی تنخواہوں میں 80 فیصد تک اضافے کا فیصلہ کیا ہے، کیونکہ اللہ کی رحمت اورٹیم کی کاوش سے ہی ہم آج اس مقام تک پہنچے ہیں۔
وفاقی وزیر اسد عمر نے سماجی رابطے کی ویب سائٹ ٹوئٹر پر اپنے پیغام میں کہا ویل ڈن سلمان اقبال، اے آر وائی نے ملازمین کی تنخواہوں میں خاطر خواہ اضافہ کیا ہے، بڑے کاروباری گھرانوں نے پچھلے سالوں میں غیر معمولی منافع کمایا ، امید ہے دوسرے لوگ بھی پیروی کریں گے اورملازمین سے منافع شیئر کریں گے۔
وفاقی وزیر اطلاعات فواد چوہدری نے اپنے اے آر وائی نیٹ ورک کے سی ای او سلمان اقبال کا شکریہ ادا کرتے ہوئے کہا اے آر وائی کی طرح باقی میڈیا بھی ذمہ داری کا احساس کریں ، منافع کے ثمرات لوگوں تک پہنچائیں ہمارا تنخواہ دار طبقہ مہنگائی سے متاثر ہے، ایسے اقدامات اس طبقے کو مہنگائی سے نمٹنے میں معاون ہوں گے، صحت کارڈ کےذریعے حکومت نے میڈیکل اخراجات کا خرچ پہلے ہی ذمے لیا ہے۔
سینیٹر فیصل جاوید نے اپنے ٹویٹ میں کہا کہ اے آر وائی کی جانب سے تنخواہوں میں اضافے سے اچھا تاثر جائیگا، پاکستان کی اسٹاک مارکیٹ 10سال کے بلند منافع پر ہے، کارپوریٹ سیکٹر کو2021میں 930 ارب کا منافع ہوا، وزیراعظم نے کارپوریٹ سیکٹر سے تنخواہوں میں اضافے کی اپیل کی تھی، امید ہے دوسری کمپنیاں بھی اےآروائی کے اقدام کی پیروی کریں گی۔
معاون خصوصی شہباز گل نے بھی ملازمین کی تنخواہوں میں اضافے کے اعلان پر اے آر وائی کا شکریہ ادا کرتے ہوئے کہا 100بڑی کمپنیزنے 930 ارب اوراسٹاک ایکسچینج نے 260 ارب کا منافع کمایا، میڈیا کو بھی کم از کم 40فیصد کا منافع ہوا، یہ شرف صرف اے آر وائی کو ملا جس نے وزیراعظم کی اپیل پر تنخواہوں میں اضافہ کیا
یاد رہے کہ وزیراعظم نے کاروباری طبقے سے اپنے ملازمین کی تنخواہیں بڑھانے کی درخواست کرتے ہوئے کہا تھا کہ کارپوریٹ سیکٹر کو ملازمین کی تنخواہوں میں اضافہ کرنا چاہیے۔
