مسلم لیگ ن کے رہنما اور سابق وفاقی وزیر خرم دستگیر نے نجی ٹی وی چینل کے پروگرام ندیم ملک لائیو میں گفتگو کرتے ہوئے کہا کہ چاہے پنجاب کے وزیر اعلیٰ چودھری پرویز الہٰی بن جائیں پاکستان مسلم لیگ ن چاہتی ہے کہ جلد ازجلد مداخلت سے پاک شفاف انتخابات ہوں۔
میزبان نے سوال کیا کہ کب تک عدم اعتماد کی تحریک پیش ہونے جا رہی ہے کیونکہ اپوزیشن رہنما خود آئندہ ہفتے کے شروع پر تحریک سے متعلق دعوے کر رہے ہیں۔ جواب میں انجنیئر خرم دستگیر نے کہا کہ اس فاشسٹ حکومت کے4 پیادے روزانہ کی بنیاد پر عوام کا معاشی قتل کر رہے ہیں نمبر ایک مہنگائی، دہشت گردی، معاشی غلامی اور فاشزم ہے۔
لیگی رہنما نے کہا کہ اس طرح کی تحریکوں کو کامیاب بنانے کیلئے طاقت کے اشتراک سے آگے بڑھاجاتا ہے مگر ہمارا مقصد اپنے ہدف تک پہنچنا ہے تا کہ شفاف انتخابات کا انعقاد یقینی بن سکے اس کے بعد نتیجہ چاہے جو بھی ہو مگر شفاف انتخابات ہوں جن میں اداروں کی مداخلت نہ ہو۔