چیئرمین پبلک اکاؤنٹس کمیٹی نور عالم خان نے ویڈیو اسکینڈل میں سابق چیئرمین نیب جسٹس ریٹائرڈ جاوید اقبال کو پی اے سی میں بلانے کا عندیہ دیدیا۔
اجلاس میں جسٹس (ر) جاوید اقبال اور طیبہ گل نامی خاتون کے ویڈیو اسکینڈل کے معاملے پر چیئرمین پی اے سی نور عالم خان نے کہا ہے کہ ایک خاتون نے سابق چیئرمین نیب کے خلاف شکایت بھیجی ہے۔
اجلاس میں چیئرمین پی اے سی نے بتایا کہ طیبہ گل کی طرف سے نہ صرف سابق چیئرمین نیب جسٹس (ر) جاوید اقبال بلکہ ڈی جی نیب سلیم شہزاد کے خلاف بھی کارروائی کا مطالبہ کیا گیا ہے۔
نور عالم خان نے خط کی کاپی میڈیا اور ممبران کمیٹی کو بھی دے دی۔ انہوں نے کہا کہ خاتون کی شکایت چئیرمین نیب کو بھیج کر رپورٹ طلب کی ہے۔ چیئرمین پی اے سی نے اجلاس میں سوال اٹھایا کہ کیا ہمیں سابق چیئرمین نیب اور خاتون کو بھی بلانا چاہیے؟
نور عالم خان نے کمیٹی کے سامنے کہا کہ ہمیں ہر ایک کو کہنے اور سننے کا موقع دینا چاہیے، دونوں لوگ ہمارے لیے قابل احترام ہیں۔ مگر یہ بھی یاد رہے کہ سابق چیئرمین نیب ہو یا کوئی اور اگر کسی نے اختیارات سے تجاوز کیا ہے تو اس کو اختیارات کے ناجائز استعمال کا جواب دینا ہوگا۔
نور عالم خان کا کہنا تھا کہ ويڈيوز ميں نے ديکھی بھی ہيں، اس معاملے کو منطقی انجام تک پہنچايا جائے گا۔ الزام لگانے والے کو ثبوت لانا پڑيں گے جبکہ سابق چيئرمين نیب اور خاتون کو اپنی بات کہنے کا پورا موقع ديا جائے گا۔
یاد رہے کہ مئی 2019 میں نجی ٹی وی نے چیئرمین نیب کی ٹیلی فونک گفتگو اور طیبہ گل سے جسٹس ریٹائرڈ جاوید اقبال کی اپنے دفتر میں ملاقات کی ویڈیو نشر کی تھی۔
