پاکستان سپرلیگ 7 میں کراچی کنگز کی پے در پے آٹھویں شکست نے ناصرف شائقین کرکٹ کو مایوس کیا بلکہ ٹیم کے صدر سوئنگ کے سلطان وسیم اکرم کو بھی غصہ دلا دیا۔ گزشتہ روز ہونے والے میچ میں وسیم اکرم نے بابر اعظم کی حکمت عملی پر عدم اطمینان کا اظہار کرتے ہوئے انہیں جھاڑ دیا۔
تفصیلات کے مطابق کراچی کنگز اور ملتان سلطانز کے مقابلے کے آخری لمحات میں وسیم اکرم خود باؤنڈری لائن پر آ پہنچے اور وہاں کھڑے کراچی کنگز کے کپتان بابراعظم پر برہم ہو گئے۔ دوران میچ وسیم اکرم اور بابر کے درمیان کیا بات ہوئی اس کا تو کسی کو علم نہ ہوا لیکن سوشل میڈیا صارفین وسیم اکرم کے اس رویے پر نالاں دکھائی دیے اور بابراعظم کی حمایت میں سامنے آگئے۔
ثمرہ خان نے کہا کہ یہ کیا ہو رہا ہے وسیم اکرم آپ بابر اعظم کے ساتھ ایسا کیسے کر سکتے ہیں۔
ارشد خان تنولی نے اپنے خیالات کا اظہار کرتے ہوئے لکھا کہ پاکستان کے تمام فارمیٹس کے کپتان کے ساتھ وسیم اکرم کا یہ رویہ دیکھ کر خاصی مایوسی ہوئی، بابر ہمارا ہیرو اور دنیا کے بہترین کھلاڑیوں میں سے ایک ہے، ہار اور جیت کھیل کا حصہ ہوتا ہے۔
عروج جاوید نامی صارف نے برہمی والے انداز میں وسیم اکرم کو تنبیہ کی کہ برائے مہربانی اپنی حد پار نہ کریں۔
ایک اور صارف نے کہا کہ وسیم اکرم بطور بولنگ کوچ ناکام ہوگئے لیکن وہ اپنی مایوس کن کارکردگی کا غصہ یوں بابر پر نکال رہے ہیں۔
سید رضا نامی صارف نے منیجمنٹ پر تنقید کرتے ہوئے کہا کہ برائے مہربانی بابر سے یوں تلخ نہ ہوں، صرف وہ ہی ہے جو ٹیم کے لیے پرفارم کررہا ہے، بابر ہمارا قومی ہیرو اور دنیا کا نمبر ون کھلاڑی ہے۔