سینئر تجزیہ کار عارف حمید بھٹی نے انکشاف کیا ہے کہ وزیراعلی پنجاب پرویز الہیٰ دو بار ایک پیغام اور ایک شخصیت کا نام ایف آئی آر سے نکلوانے کیلئے عمران خان کے پاس گئےتاہم عمران خان نے ان سے معذرت کرلی ہے۔
جی این این کےپروگرام "خبرہے" میں خصوصی گفتگو کرتے ہوئے عارف حمید بھٹی کا کہنا تھا کہ آج دو دفعہ وزیراعلی پنجاب چوہدری پرویز الہیٰ صاحب موسم کا حال پوچھنے کیلئے تو عمران خان کے پاس نہیں گئے،میری اطلاع کے مطابق چوہدری پرویز الہیٰ جو پیغام لے کر گئے تھے جو نام و ایف آئی آر سے نکلوانا چاہتے تھے، عمران خان نے اس سے معذرت کرلی ہے۔
عارف حمید بھٹی نے کہا کہ عمران خان نے وزیراعلی پنجاب کو جواب دیا کہ جو درخواست میں نے دی ہے اسی پر مقدمہ درج کیا جائے، اس درخواست میں کوئی تبدیلی نہیں ہوگی، غیر جانبدارنہ تحقیقات کی جائیں، میں کسی کو بھی بے گناہ یا گنہگار نامزد نہیں کرنا چاہتا۔
انہوں نےمزید کہا کہ پیر کے دن واقعہ ہوتا ہے، پیر کے دن سپریم کورٹ نوٹس لے کر حکم دیتی ہے، اس حکم کو بھی 4 سے 5 گھنٹے گزرجاتے ہیں مگر ایف آئی آر نہیں ہوتی، کیا پولیس سپریم کورٹ سے بھی بالا ہے۔
سینئر تجزیہ کار نے مزید کہا کہ مقدمے کا اندراج نا کرنا ایک مجرمانہ فعل ہے، یہ لوگ گرفتار ہوسکتے ہیں یا نوکریوں سے جاسکتے ہیں، جہاں تک صوبائی حکومت کا تعلق ہے میں تو اندر کی بہت سی باتیں جانتا ہوں اس لیے کہتا ہوں کہ یہ پی ٹی آئی کی حکومت نہیں ہے مگر عمران خان کے بقول پنجاب میں ان کی حکومت ہے۔
انہوں نے کہا کہ آج کیس کی سماعت کے دوران چیف جسٹس عمر عطا ء بندیال نے ریمارکس دیتے ہوئے بھی کہا کہ 90 گھنٹوں سے زیادہ وقت گزرنے کے باوجود ایف آئی آر درج نہیں ہوئی، کرمنل سسٹم کے تحت پولیس خود اس معاملے کی ایف آئی آر درج کرسکتی تھی، آئی جی پنجاب نے عدالت کو بتایا کہ حکومت پنجاب نے ہمیں ایف آئی آر درج کرنے سے منع کررکھا ہے۔
