پٹرولیم مصنوعات کی قیمتوں میں اضافے کو مسترد کرتے ہوئے پاکستان گڈز ٹرانسپورٹرز کی طرف سے پہیہ جام ہڑتال کرنے کا اعلان کر دیا گیا ہے۔ ذرائع کے مطابق پاکستان گڈز ٹرانسپورٹرز نے پٹرولیم مصنوعات کی قیمتوں میں اضافے کو مسترد کرتے ہوئے کہا ہے کہ ہمارے ٹرانسپورٹر اپنی گاڑیاں کھڑی کرنے پر مجبور ہو چکے ہیں۔
پی ڈی ایم کی حکومت ختم ہونے کے بعد نگران حکومت کی طرف سے بھی کوئی ریلیف فراہم نہیں کیا جا رہا جو کہ ظلم اور جبر کے مترادف ہے۔
جنرل سیکرٹری پاکستان گڈز ٹرانسپورٹرز ایسوسی ایشن نبیل طارق نے نجی ٹی وی چینل سے گفتگو کرتے ہوئے کہا ہے کہ کل 2 ستمبر بروز ہفتہ ملک بھر کی تمام بکنگ ایجنسیاں بند رہیں گی۔ گڈزٹرانسپورٹرز کے ساتھ کسٹمزحکام کی طرف سے زیادتیوں کو بند ہونا چاہیے اور نیشنل ہائی وے اتھارٹی (این ایچ اے) کی طرف سے بے جا جرمانوں کو بند ہونا چاہیے۔
انہوں نے کہا کہ پٹرولیم مصنوعات کی قیمتوں میں اضافے سے ملک کے عام شہریوں کےساتھ ساتھ ٹرانسپورٹرز بھی متاثر ہوتے ہیں جس سے کاروبار کرنا ناممکن ہوتا جا رہا ہے۔ ہماری ہڑتال بجلی کے بلوں، پٹرولیم مصنوعات کی قیمتوں میں اضافے کے خلاف ہے، اگر ہمارے مطالبات کو نہ مانا گیا تو یہ ہڑتال غیرمعینہ مدت تک جاری رہ سکتی ہے۔
علاوہ ازیں صدر پاکستان گڈز ٹرانسپورٹرزملک شہزاد اعوان نے کہا کہ پی ڈی ایم حکومت میں ملک کے عوام سے کیے گئے ظلم سلسلہ اب تک جاری ہے۔ ہر روز بڑھتی ہوئی مہنگائی اور پٹرول وڈیزل کی بڑھتی ہوئی قیمتوں کے ساتھ ہمارا کاروبار کرنا مشکل بنا دیا ہے، اس ظلم کے ساتھ کام نہیں کر سکتے۔ ٹرانسپورٹرز کی دیگر تنظیموں کے ساتھ مشاورت کرنے کے بعد ردعمل کا اعلان جلد کیا جائے گا۔
