کراچی کے علاقے ضلع وسطی میں موبائل فون چھینے جانے کی بڑی واردات پیش آئی جس میں کریم آباد میں چائے کے ہوٹل میں بیٹھے 30 سے زائد افراد سے موبائل فون چھین لیے گئے۔
مسلح ڈاکو ہوٹل پر موجود لوگوں سے نقدی اور قیمتی سامان بھی چھین کر لے گئے۔ پولیس کے مطابق 5 سے 6 ڈاکو 3 موٹرسائیکلوں پر سوار تھے اور واردات کے بعد با آسانی فرار ہوگئے۔
پولیس کا کہنا ہے مفرور ملزموں کی گرفتاری کیلئے ناکہ بندی کر کے مختلف علاقوں میں چھاپہ مار کارروائیاں کی جا رہی ہیں جلد ہی ملزمان کو گرفتار کر لیا جائے گا۔
دوسری جانب کچھ روز قبل کراچی کے علاقے صدر موبائل مارکیٹ میں نجی کمپنی کے شوروم پر ہونے والی بڑی ڈکیتی کے ملزموں کو گرفتار کر لیا گیا ہے۔
پولیس کے مطابق کمپنی میں ڈکیتی کی بڑی واردات میں ادارے کا ملازم ملوث نکلا، جسے اس کے دو ساتھیوں سمیت گرفتار کر لیا گیا ہے۔
گرفتار 3 ملزمان کے قبضے سے ایک مسروقہ کار، ڈکیتی کے دوران لوٹی گئی رقم ساڑھے چھ لاکھ روپے، ڈکیتی کی رقم سے خریدی گئی ایک نئی ہنڈا 125 موٹر سائیکل اور ایک نیا آئی فون برآمد کیا گیا ہے۔