کیا کی مختلف ماڈلز کی گاڑیوں کی قیمتوں میں کمی کا اطلاق 6 اکتوبر سے ہو گا: لکی موٹرز کارپوریشن
کیا موٹرز کارپوریشن کی گاڑیوں کی قیمتوں میں کمی کا اعلان کر دیا گیا ہے۔
ذرائع کے مطابق پاکستان میں کیا موٹرز کارپوریشن کی گاڑیوں کی سمبلنگ کرنے والے ادارے لکی موٹر کارپوریشن کی طرف سے امریکی ڈالر کی قدر میں کمی اور روپے کی قدر بڑھنے کے باعث مختلف گاڑیوں کی قیمتوں میں کمی کا اعلان کیا گیا ہے۔ لکی موٹر کارپوریشن نے کیا کی گاڑیوں کے مختلف ماڈلز کی قیمتوں میں 1 سے لے کر 5 لاکھ روپے تک کی واضح کمی کا فیصلہ کیا ہے۔
میڈیا رپورٹس کے مطابق کیا کی گاڑی سپورٹیج بلیک لمیٹڈ ایڈیشن اب 93 لاکھ روپےمیں دستیاب ہو گا جس کی قیمت اس سے پہلے 96 لاکھ 50 ہزار روپے تھی۔ سپورٹیج اے ڈبلیو ڈی گاڑی 87 لاکھ 70 ہزار روپے کر دی گئی ہے جس کی اس سے پہلے قیمت 89 لاکھ 20 ہزار روپے تھی۔
کیا کی سپورٹیج ایف ڈبلیو ڈی گاڑی کی نئی قیمت 80 لاکھ 40 ہزار روپے رکھی گئی ہے جس کی قیمت اس سے پہلے 81 لاکھ 90 ہزار روپے تھی۔ کیا کی پیکانٹو اے ٹی گاڑی کی نئی قیمت 38 لاکھ 50 ہزار روپے رکھی گئی ہے جس کی قیمت اس سے پہلے 39 لاکھ 50 ہزار تھی۔ کیا کے ان ماڈلز کی گاڑیوں کی قیمتوں میں 1 لاکھ روپے سے لے کر 3 لاکھ روپے تک کی کمی کی گئی ہے۔
کیا کی گاڑیوں کے کچھ ماڈلز کی قیمتوں میں 5 لاکھ روپے تک بڑی کمی کی گئی ہے جن میں 3 گاڑیاں شامل ہیں۔ کیا کی گاڑی سورینٹو 3.5 ایل ایف ڈبلیو ڈی کی نئی قیمت 1 کروڑ 12 لاکھ 90 ہزار روپے کر دی گئی ہے جس کی قیمت اس سے پہلے 1 کروڑ 17 لاکھ 90 ہزار روپے تھی جبکہ قسطوں میں خریدنے پر قیمت میں تبدیلی نہیں کی گئی۔
سورینٹو 2.4 ایل ایف ڈبلیو ڈی کی نئی قیمت اب 1 کروڑ 3 لاکھ روپے کر دی گئی ہے جس کی قیمت اس سے پہلے 1 کروڑ 8 لاکھ روپے تھی۔ سورینٹو 2.4 ایل اے ڈبلیو ڈی کی نئی قیمت اب 1 کروڑ 12 لاکھ روپے کر دی گئی ہے جس کی قیمت اس سے پہلے 1 کروڑ 17 لاکھ روپے تھی۔ قسطوں میں خریداری کرنے پر قیمت میں تبدیلی نہیں ہو گی۔
لکی موٹرزکارپوریشن کے اعلامیہ کے مطابق روپے کی قدر میں اضافے اور ڈالر کی قیمت میں کمی کے باعث ادارے نے اپنے صارفین کو فائدہ پہنچانے کیلئے قیمتوں میں کمی کا فیصلہ کیا ہے۔ کیا کی مختلف ماڈلز کی گاڑیوں کی قیمتوں میں کمی کا اطلاق 6 اکتوبر سے ہو گا۔
