وزیراعظم عمران خان نے مقامی سطح پر قدرتی گیس کی تلاش کیلئے لائسنس کے اجراء کے عمل کو تیز کرنے کی ہدایات جاری کردی ہیں۔
وزیراعظم عمران خان نے ملک میں گیس کی موجودہ صورتحال سے متعلق اجلاس کی صدارت کی، اجلاس میں متعلقہ حکام کی جانب سے وزیراعظم کو ملک میں گیس کے مجموعی ذخائر، طلب و رسد ، قلت اور ایل این جی کی درآمد سے قلت پوری کرنے سے متعلق تمام تفصیلات پر بریفنگ دی گئی۔
اجلاس میں وزیراعظم کو بتایا گیا کہ ملک میں گیس کی مجموعی طلب47ہزار ایم ایم سی ڈی ایف ہے تاہم سردیوں میں گیس کی کھپت میں اضافے کی وجہ سے یہ مقدار6 سے ساڑھے 6 ہزار ایم ایم سی ڈی ایف تک پہنچ چکی ہے۔
بریفنگ کے دوران حکام نے بتایا کہ اس وقت ملک میں گیس کی مجموعی سپلائی 3300 ایم ایم سی ڈی ایف ہے اور اس میں ہر سال کمی واقع ہورہی ہے، قدرتی گیس کی قلت کو پورا کرنے کیلئے ایل این جی درآمد کی جارہی ہے مگر ایل این جی قدرتی گیس کے مقابلے میں کافی مہنگی ثابت ہوتی ہے۔
وزیراعظم عمران خان نے اجلاس کے دوران ہدایات جاری کیں کہ مقامی طور پر قدرتی گیس کے ذخائر تلاش کرنے کیلئے لائسنسز جاری کرنے کے عمل کو تیز کیا جائے، قدرتی گیس ہی ایندھن کا سستا ترین ذریعہ ہے، اسی لیے مقرر کردہ ٹائم لائنز میں مزید تاخیر کیے بغیر لائسنسز کے اجراء کے عمل کو تیز کرنے سے متعلق ہدایات پر عمل درآمد کیا جائے۔
