![cocomo-mifta-and-dr-zubaor.jpg](https://www.siasat.pk/data/files/s3/cocomo-mifta-and-dr-zubaor.jpg)
ماہر معاشیات ڈاکٹر محمد زبیر نے کہا ہے کہ جو نئی معاشی ٹیم آئی ہے اسے کچھ سمجھ ہی نہیں ہے، ہمارے کم سن وزیر خزانہ ملک کو کینڈی لینڈ کا اکاؤنٹ سمجھ رہے ہیں، آئی ایم ایف یہ پروگرام ایک بیہودہ پروگرام ہے۔
جی این این کے پروگرام خبرہے میں خصوصی گفتگو کرتے ہوئے ڈاکٹر محمد زبیر نے ملک میں پیٹرولیم مصنوعات کے بحران کے حوالے سے گفتگو کرتے ہوئے کہا کہ سب جانتے ہیں کہ ہمارے فارن ایکسچینج ریزرو وہ کم ترین سطح پر پہنچ گئے ہیں، اب اس میں جو پیسہ موجود ہے وہ شائد ہم استعمال بھی نہیں کرسکتے۔
انہوں نے مزید کہا کہ آئی ایم ایف کے ساتھ ابھی معاہدہ بھی نہیں ہوا، ہو بھی جائے تو ہمیں تھوڑے سے پیسے ملیں گے، اس سے اتنا فائدہ ضرور ہوگا کہ اس پیسے کے آنے سے ہمیں دیگر قرضہ جات بھی مل جائیں گے، مگر یہ تمام قرضہ جات ہیں، ان قرضوں کو لے کر ہم موجودہ قرضوں کی ادائیگی کریں گے تو یہ مت سمجھیں کہ خطرہ ختم ہوگیا ہے، خطرہ کچھ دیر کیلئے ٹل گیا ہے۔
ماہر معاشیات نے مزید کہا کہ اگر پیٹرول فروخت کرنے والے پیٹرول فراہمی سے قبل 100 فیصد قیمت کی ادائیگی کی شرط رکھ رہے ہیں تو آپ سمجھ جائیں کہ مارکیٹ پاکستانی معاشی حالات کو کس نظر سے دیکھ رہا ہے، لوگ آج ہی پیٹرول پمپس کے باہر لائنیں لگاکر کھڑے ہیں۔
ڈاکٹر محمد زبیر نے موجودہ حکومت کی پالیسیوں کو آڑے ہاتھوں لیتے ہوئے کہا کہ معاشی ٹیم کو سمجھ ہی نہیں، کم سن وزیر خزانہ کو سنا ، پاکستان کوئی کینڈی لینڈ کا اکاؤنٹ نہیں ہے،ہمیں بتایا جائے کہ ہماری فنانشل مینجمنٹ کا رخ کس طرف ہے،کیااخراجات کو کم کرنے کا فیصلہ کرلیا گیا ہے؟ یہ نہیں کہ ہم کفایت شعاری کررہے ہیں ، فیول الاؤنس کم کررہے ہیں ، ان باتوں پر تو ہنسی آتی ہے ، کیا ملکی معیشت ایسے اقدامات سے ٹھیک ہوگی؟
انہوں نےکہا کہ حل یہ ہے کہ اگر حکومت کے پاس 1لاکھ سرکاری گاڑیاں ہیں تو80 ہزار واپس کریں،تنخواہیں بڑھانابند کریں،15 فیصد ہر چیز میں کٹوتی کریں تو پھر بجٹ خسارہ اس حد تک کم ہوگا کہ مہنگائی اورکرنٹ اکاؤنٹ کوسنبھالا جاسکتا ہے۔
آئی ایم ایف پروگرام کے حوالے سے بات کرتے ہوئے انہوں نے کہا کہ میں اسے ایک بے ہودہ پروگرام کہوں گا،کہ جومانےہوئے اصولوں کی خلاف ورزی کررہے ہیں، مغربی ممالک پر جب قرضے بڑھے تو انہوں نے سرح سود 2،3 فیصد تک محدود کردیا ہمارے یہاں15، 16 فیصد تک پہنچ گیا ہے،جب شرح سود اتنا ہوگا تو قرضے تو خود بخود ڈبل اور ٹرپل ہوجائیں گے۔