فل کورٹ کی استدعا مسترد کر کے غیرجانبداری کے اصول پر شب خون مارا گیا ہے، پامامہ فیصلے کا تسلسل انصاف ہرگز نہیں ہو سکتا۔ میری سیاست عہدوں کے لئے نہیں خدمت کے لئے تھی، ہے اور رہے گی۔
تفصیلات کے مطابق سماجی رابطوں کی ویب سائٹ ٹویٹ پر حمزہ شہباز شریف نے ٹویٹ کرتے ہوئے لکھا کہ فل کورٹ کی استدعا مسترد کر کے غیرجانبداری کے اصول پر شب خون مارا گیا ہے، پامامہ فیصلے کا تسلسل انصاف ہرگز نہیں ہو سکتا۔ میری سیاست عہدوں کے لئے نہیں خدمت کے لئے تھی، ہے اور رہے گی۔ انہوں نے لکھا کہ یہ ہار نہیں جیت کی جانب ہمارا اگلا قدم ہے۔ پاکستان زندہ باد!
پاکستان مسلم لیگ ن کے آفیشل ٹویٹر اکائونٹ سے ٹویٹ کرتے ہوئے حمزہ شہباز شریف نے لکھا کہ بھٹو کو پھانسی دینے والے ججوں نے بعد میں پچھتاوے کا اظہار کیا لیکن ملک کو ہونے والے نقصان کی تلافی نہ ہو سکی، میری سیاست عہدوں کیلئے نہیں عوام کی خدمت کے لئے ہے۔
ایک اور ٹویٹ میں حمزہ شہبازشریف کا کہنا تھا کہ سدا بادشاہی اللہ تعالی کی ہے، نہ کسی کی ہار ہمیشہ کی ہے نہ کسی جیت کو دوام حاصل ہے۔ مشن پاکستان کو بچانا ہے اور میں اس سے پیچھے نہیں ہٹوں گا۔
انہوں نے ایک اور ٹویٹ میں لکھا کہ پورے پاکستان نے دیکھا کہ کس طرح غیر آئینی اقدامات کے ذریعے پہلے دن سے ہمیں جائز حق حکمرانی سے محروم رکھنے کی کوشش کی گئی۔ تمام مشکلات کے باوجود آٹے پر سبسڈی، مفت ادویات اور روشن گھرانا مفت بجلی جیسے پروگرامز سے عوام کو ریلیف دینے کے مشن سے پیچھے نہیں ہٹا۔
یاد رہے کہ سپریم کورٹ کے چیف جسٹس عمر عطا بندیال کی سربراہی میں تین رکنی بینچ نے وزیراعلیٰ پنجاب کے انتخاب میں ڈپٹی سپیکر رولنگ کے خلاف کیس میں محفوظ شدہ فیصلہ سناتے ہوئے فل کورٹ بنانے کی استدعا مسترد کردی تھی اور آج وزیراعلیٰ پنجاب کے انتخاب کے حوالے سے سپریم کورٹ نے ڈپٹی سپیکر پنجاب اسمبلی کی رولنگ کو کالعدم قرار دے دیا ہے۔ نئے وزیراعلیٰ پنجاب چوہدری پرویز الٰہی ہوں گے۔