اپٹما کے رہنما حامد زمان نے کہا کہ ملک میں 1960 کی دہائی کے بعد گزشتہ حکومت کے تین چار سالوں کے دوران صنعتی ترقی ہورہی تھی۔
آل پاکستان ٹیکسٹائل ملز ایسوسی ایشن کے رہنما نے کہا کہ ہم نے ایکسپورٹ بڑھانی تھی اور وہ اسی وجہ سے تھیں کہ جو ہمیں مراعات مل رہی تھیں، رعایتی انرجی ٹیرف مل رہا تھا، جب لوکل چیزیں بناکر ایکسپورٹ کریں گے تو خسارہ کم ہوگا۔
ان کا کہنا تھا کہ ہماری ایکسپورٹ کم از کم 40 سے 45 ارب ڈالر ہونی چاہئیں لیکن ہم ہمیشہ سے ہی عیاش قوم ہیں جیسے ہی ایکسپورٹ کچھ بڑھتی ہیں لگژری آئٹمز گاڑیاں اور دیگر چیزیں منگوانا شروع کردیتے ہیں۔
حامد زمان نے مزید کہا کہ ہمارے بجٹ کی روایتی طور پر سیاسی دستاویز ہوتی ہے، اس میں مڈل اور لوئر کلاس کے لیے ہمیشہ ہی مشکلات ہوتی ہیں، ابھی اطلاعات ہیں کہ ایک لاکھ ماہانہ تنخواہ والے پر ٹیکس بڑھا رہے ہیں، ہمارے ہاں مسئلہ یہ ہے کہ جو چند لاکھ ٹیکس نیٹ میں آتے ہیں ان پر ہی بوجھ پڑتا ہے باقی بچ جاتے ہیں۔
نجی چینل کی بجٹ نشریات میں ماہرین نے کہا کہ اس سارے معاملے میں تنخواہ دار طبقہ مارا جاتا ہے ان پر ٹیکس بڑھانے کے بجائے کم کرنا چاہیے۔
اے آر وائی نیوز کی بجٹ کے حوالے سے خصوصی ٹرانسمیشن میں گفتگو کرتے ہوئے محسن شیخانی نے کہا کہ ملک میں دو ڈھائی ماہ سے نہ سیاسی استحکام ہے اور نہ ہی معاشی، حکومت کبھی آئی ایم ایف کی طرف بھاگ رہی ہے تو کبھی کہیں لیکن اسٹیک ہولڈر سے کوئی مشاورت نہیں۔
محسن شیخانی نے کہا کہ حکومت اسٹیک ہولڈر کے ساتھ بیٹھے ان کی بھی سنے، کاروبار نہیں ہوگا تو ٹیکس کہاں سے آئے گا حکومت شارٹ فال کہاں سے کور کرے گی، آج کاسٹ پرائس بڑھنے کی وجہ سے پروجیکٹ مہنگے ہوگئے ہیں۔
معروف تاجر عارف حبیب نے کہا کہ انٹریسٹ ریٹ میں اضافہ تعیمراتی صنعت کے لیے ہمیشہ چیلنج رہے گا، مہنگائی بڑھنے سے ہر شعبہ متاثر ہوا ہے، تعیمراتی شعبے پر بھی اثر پڑا ہے ان لوگوں کے لیے مسائل زیادہ ہوئے ہیں جنہوں نے مہنگائی بڑھنے سے قبل ہی بکنگ کرلی تھی۔
