quraan main istemaal kiye ge ilfaaz ke hamesha woh maani dhoonden jo islam ke deen hone ke context main hun na ke mazhab hone ke context main. misaal ke tor per qayaam ke maani hen seedh khdaa hona. laikin deen ke context main is ke maani deene islam per seedhaa khadaa hona hen, yaani her baat aur her kaam deene islam ke ain mutaabiq kerna ya deene islam ke dastooro qanoon ke ain mutaabiq chalna.
issi tarah lafze rakoo ke maani hen khud ko deene islam ke dastooro qanoon ke ain mutaabiq dhaalna. to bend or model or mould oneself according to deen of islam. yaani apni zindagi ko deene islam ke mutaabiq mord lena. to shape one's life according to way of life called deen of islam in the quran.
aise hi lafze sajdah ke maani hen kisi maqsad ya raaste ya baat ya kaam ko tasleem kerna aur us ko poora kerne ke liye amal ya zaroori kaam kerna ya iqdaam uthaana. yaani deene islam ko tasleem kerna aur us ke diye ge dastooro qanoon per chalna ya amal kerna. masjid issi liye woh jaga hoti hai jis main log jama ho ker aik doosre ki madad se khudaa ke dastooro qanoon ke mutaabiq us ke ehkamaat bajaa laate hen. ye pooja paat ki jaga nahin hoti na hi ho sakti hai. ye aik community haal ho sakta hai jahaan per log jama ho ker apne apne ilaaqe ke masaail per aapas main tabaadlae khayalaat kerte hen aur darpesh masaail ka hal dhoondte hen khudaa ki hidaayat ki roshni main. masjid aik kaam kerne ka daftar hoti hai, jaise parliament waghera. ye aik factory bhi ho sakti hai jahaan per woh cheezen tayaar ki jaayen jo awaam ki zaroorat hen. yaani her jaga ya mulk aik masjib hi hai jahaan log sirf aur sirf khudaa ke liye kaam karen us ke karinde ban ker.
quraan main aur hadis main deene islam ke liye mazhab ka lafz istemaal hi nahin kiya gayaa. mullaan log jaise salaah ke lafz ka tarjama mazhabi bunyaad per namaaz kerte hen waisi hi baaqi ilfaaz ka tarjama bhi mazhab ke context main ker ke logoon ko ghalat simt le jaate hen.
lihaaza agar aap ne mullaan ke haraami pan ko samajhna hai to aisi baatun per ghoro fiker kerna shuroo karen. taa keh aap ko pata chale mullaan ne aaj tak deene islam ke saath kia kia khail khaile hen. phir ye keh mullaan, hukamraanu aur sarmayadaarun ne to jo is ummat ke saath kiya woh kiya magar baaqi insaanu ko kia ho gayaa hai keh woh kyun khud apne aap se haraami pan ker rahen aur unhi logoon ki madad ker rahe hen jo khud unhi ka istehsaal ker rahe hen?
deene islam ke context main qibla zindagi ke maqsad (yaani focal point) ko kehte hen jo quraan ne insaanu ke liye mutaiyan kiya hai issi liye to khudaa ne insaanu ko deene islam diya hai taa ke is per chal ker log woh maqsad poora ker saken jis ke liye khudaa ne un ko peda kiya hai. issi liye ham log aik doosre ko salah dete hen keh yaar apna qibla drust ker lo. qiblah us jaga ko bhi kehte hen jo kisi maqsad ke liye chun li jaaye. maslan logoon ka mil jul ker aik maqaam ka intikhaab ker lena ya koi maqaam muqarar ker lena apni meetings waghera ke liye jaise parliament house ya community hall waghera.
khudaa ne logoon ko is liye peda kiya hai taa keh woh us ko us ke kaamun ki wajah se jaanen. khudaa ke kaam kiya hen? is duniya ki takhleeq aur insaanu ki taraf bhaije ge us ke paighamaat. khudaa ne ye kaam kyun kiye? kyunkeh us ne chahaa keh woh khud ko zahir kare apne kaamun ke zariye aur us ne log issi maqsad ke liye aqlo fiker ki qaabliyat de ker anjaan peda kiye, ta keh woh us ko us ke kaamun ke zariye apni madad aap ke teht jaan ker us ki aur apni badhayee ke kaam karen. issi ka naam khudaa ki takbeer bayaan kerna hai. sirf lafzi tor per allah hu akbar kehne se khudaa badaa nahin ban jaata. khudaa ko insaanu ko badaa saabit kerna hai kuchh aise kaam ker ke jisse khudaa ki badhayee saabit bhi ho sake. issi liye us ke diye ge nizaamen zindagi ko theek tarah se samajhna aur phir us ko theek tarah se naafiz karna lazmi hai. pooja paat se khudaa ki ya insaanu ki pani badhayee saabit kerna mumkin hi nahin hai.
lihaaza insaan khudaa ko pooja paat se nahin jaan sakte balkeh apna aqlo fiker istemaal ker ke us ko jaan sakte hen aur us ki badhayee ko jaanane ke liye us ki baatun per amal ker ke apni aur khudaa ki bhadayee ko jaan sakte hen. jisse khudaa apne banaaye huwe insaanu per khush aur insaan apne banaane waale khudaa per khush. matlab ye keh khudaa ne ham insaanu ko bahot kuchh ker sakne ke qaabil banaaya hai aur agar ham woh kuchh nahin karen ge jisse khudaa ki shaan ham insaanu main nazar aaye to ham insaan kuchh bhi nahin hen, khud ko jo chahe samajhte rahen. ghalat kaam kerne se ya drust kaam ghalat tareeqe se kerne se ya kuchh bhi na kerne se ham khud ko khudaa ka behtareen shahkaar saabit hi nahin ker sakte. lihaaza zaroori hai ham asal baat ko samjhen aur apne haraami pan se baaz aayen aur khud ko halaali ban ker dikhaayen.
deene islam aik zindagi guzaarne ka raasta hai aur zindagi pooj paat se nahin guzaari jaa sakti keh isse insaanu ke pait nahin bharte, yaani un ki zindagi ki zaroorten poori nahin ho saktin. issi liye insaanu ki zindagi ki zaroortun ko theek tarah se poora kerne ke khudayee tareeqe ko deene islam kehte hen, pooja paat ko nahin. duniya bhar main sab haraami log ro rahe hen magar majaal hai keh aqlo fiker se kaam le ker asal baat ko samajhne ki theek tarah se koshish karen ta keh phir us per theek tarah se amal bhi ker saken aur yun apne bekaar rone dhone se nijaat bhi haasil ker saken.
duaa ka aik maani quraan ke context main khudaa ke diye ge dastooro qanoon per bharosa karne ke hen jisse ham khudaa per tawakul kerna kehte hen. aur is ke aik maani khudaa ke un systems, structures, procedures or practices per bharosa kerna bhi hen jo khudaa ne is takhleeq ko chalaane ke liye set up kiye hen. is ke aik aur maani bhi hen yaani insaanu ka apni khawaaishaat ka izhaar kerna. is ke her giz ye maani nahin hen aur na hi ho sakte hen keh log ro ro ker din raat khudaa se duaayen karen feryaaden karen apne apne kaam kerwaane ke liye aur khudaa un ke woh woh kaam ker de.
is ki wajah ye hai keh khudaa insaanu ko kaise aise kaam kerne ke liye keh sakta hai jin ka nateeja hi na nikal sake? yaani agar aap khudaa se apne maqsad ke liye duaa karen to kia khudaa aap ka maqsad poora kare ga jaisa aap chahte hen ya ker sakta hai? her giz nahin. kyun nahin? is liye keh khudaa ne ye duniya aur is main mojood her shai khud apne liye banayee hai yaani isse khudaa ka jo maqsad tha us ko poora kerne ke liye us ne ye sab kuchh banaaya hai, hamaare apne banaaye huwe maqaasid ko poora kerne ke liye nahin. agar khudaa hamaari sune ga to phir poora ho gayaa us ka maqsade takhleeq?
kia ham insaanu ko itni aqal hai keh ham khudaa ko bhi apne peechhe lagaa len bajaaye khud us ki hidaayat ke peechhe chalne ke? phir woh hamaari kis kis khawaaish ko poora kere ga ya ham main se kis kis ki khawaaish poori kare ga? khud ham logoon main kitni tarah ke kitne hi ikhtilafaat hen to ye sab kerna khudaa ke bhi bas ki baat nahin hai. issi liye khudaa ham ko aise kaam kerne ki hadayaat kyunker dega jo khud us ki zaat ke liye kerne hi naamumkin hen? lihaaza aqal seekho aur ghalat baaten khudaa rasool se mansoob mat karo balkeh kerna band karo. namaazen, roze, zakaat aur hajj waghera sab ilfaaz ke maani mullaan ne mazhabi context main tabdeel kiye hen warna deene islam ke context main in ke woh maani bikul hi nahin hen jaise main baar baar in baatun ko samjhaa chuka hun apni posts main. un ko ghor se padho.
wuzoo ka lafz bhi quraan main istemaal nahin huwa hai. phir zaraa socho to sahi keh agar paighamber ne deen mazhab hi ko kehna tha to phir quraan main lafze mazhab kyun istemaal nahin kiya gayaa? logoon ko itni lambi lambi baaten bataane ke bajaaye khudaa bas logoon ko bataa deta keh islam mazhab hai, deen nahin hai. khud quraan hi main mazhab aur wuzoo jaise ilfaaz istemaal ker diye jaate aur logoon ko bataa diya jaata keh wuzoo kis balaa ka naam hai aur mazhab kia hota hai. quraan main ghusal ka lafz istemaal huwa hai jis ke maani nahaana hai. ab nahaana zaroori nahin hai paani hi se ho. insaan ilm ki roshni main bhi nahaa sakta hai ya nehlaaya jaa sakta hai.
issi liye wahee ke ilm se insaan ko zehni pakeezagi milti hai keh woh insaan ko ilm ki roshni main nehlaa deti hai. yahee tazkiyae nafs hai, yaani aik achhi insaani personality issi se wajood main aa sakti hai. issi liye quraan hai hi insaan saazi ki kitaab. yahee maani hen quraan ko saaf suthre logoon ke chhune ke. yaani jin ko hidaayat ki talab hai quraan sirf unhi ko hidaayat ataa ker sakta hai. ab khudaa ki taraf se hidaayat sirf unhi logoon ki talab ho sakti hai jin ko is ka maqasad bhi maloom ho apni tajarbaati zindagi ke ilm ki wajah se. issi liye teeno tarah ka ilm noorun alaa noor waali baat ho jaati hai yaani sone per sohaaga. aik ilm woh hai jo her insaan ka apna zaati tajarba hota hai. yahee bunyaad hai her tarah ke baaqi aloom ki. doosra ilm woh hota hai jo log aik doosre ke zindagi ke tajarbaat se seekhte hen, yaani log aik doosre ke saath apni apni zindagi ke tajarbaat share kerte hen. teesra ilm woh hota hai jo khudaa ki taraf se baaz insaanu ko wahee hota hai jo us ko aage pohnchaate hen deegar insaanu tak. jo aaj ke dor ke liye sirf aur sirf quraan hi hai.
iqbal ne issi liye kahaa tha keh mullaan ki azaan aur mujahid ki azaan aur. mullaan samajhta hai azaan namaaz ke liye hai magar asal main ye deene islam ki taraf dawate aam hai.