پاکستان تحریک انصاف کے رہنما زلفی بخاری نے تسنیم حیدر سےلاتعلقی کااعلان کرتے ہوئے کہا ہے کہ میں اس شخص کو جانتا تک نہیں ہوں۔
تفصیلات کے مطابق لندن میں مقیم پاکستانی تسنیم حیدر کی جانب سے گزشتہ روز کی جانے والی تہلکہ خیز پریس کانفرنس کے بعد سوشل میڈیا پر ان کی پی ٹی آئی رہنما زلفی بخاری کے ساتھ چند تصاویر شیئر کی جارہی ہیں ، ان تصاویر کو شیئر کرنے والے تسنیم حیدر کا تعلق زلفی بخاری سے ثابت کرنے کی کوشش کررہے ہیں، تاہم زلفی بخاری نےخود اس معاملےپرر دعمل دیدیا ہے۔
مائیکروبلاگنگ ویب سائٹ ٹویٹرپر زلفی بخاری نے خود یہ تصاویر شیئر کرتے ہوئے لکھا کہ بیرون ملک مقیم پاکستانیوں نے ہمیشہ مجھے بہت عزت نوازا ہے، جس تقریب کی یہ تصاویر ہیں اس میں 1500 سے زائد پاکستانی موجود ہیں، میں اس شخص کو جانتا تک نہیں ہوں، تصاویر میں یہ بھی واضح طور پر دیکھا جاسکتا ہے کہ اس شخص کو مجھ سے ملوایا جارہا ہے۔
انہوں نے مزید کہا کہ اہم بات ہے کہ تسنیم حیدر نامی شخص لندن میں بیٹھ کر سنجیدہ نوعیت کے الزام لگارہا ہے، حالانکہ برطانیہ میں کسی پر بھی جھوٹا الزام عائد کرنا اور بچ جانا تقریبا ناممکن ہے، ان الزامات کی تحقیقات ہونی چاہیے اور اگر اس شخص کےالزامات جھوٹے ہیں تو ن لیگ کو چاہیے کہ عدالت سے رجوع کرلے۔
خیال رہے کہ گزشتہ روز لندن میں مقیم پاکستانی تسنیم حیدر نے ایک تہلکہ خیز پریس کانفرنس کی اور خود کو مسلم لیگ ن لندن کا ترجمان بتاتے ہوئے انکشاف کیا کہ پاکستان میں عمران خان پر قاتلانہ حملے اور کینیا میں قتل ہونے والے سینئر پاکستانی صحافی ارشدشریف کے قتل کی منصوبہ بندی لندن میں کی گئی جس میں ن لیگ کے قائد میاں نواز شریف ملوث ہیں۔