اے آر وائی، جیو نیوز و دیگر میڈیا ہاؤسز کی جانب سے ایک خبر نشر کی گئی جس میں دعویٰ کیا گیا کہ وفاقی حکومت نے چین، روس اور قازقستان سے 5 ارب ڈالر قرض لینے کا فیصلہ کیا ہے۔ تاہم وزارت خزانہ کی جانب سے اس کی تردید کر دی گئی ہے۔
ترجمان وزارت خزانہ مزمل اسلم کی جانب سے کہا گیا ہے کہ یہ خبر حقیقت کے بالکل برعکس ہے کیونکہ اکنامک افیئرز ڈویژن میں ایسی کوئی تجویز زیر غور نہیں ہے جس میں چین سے 3 ارب ڈالر اور روس و قازقستان سے 2 ارب ڈالر لینا ہو۔
یاد رہے کہ نجی ٹی وی چینلز کی جانب سے ذرائع کے حوالے سے دعویٰ کیا گیا تھا کہ وزیراعظم عمران خان کے دورہ چین کے موقع پر 3 ارب ڈالر قرض کا معاہدہ طے پانے کا امکان ہے۔ اس کے علاوہ وفاقی حکومت نے روس اور قازقستان سے بھی 2 ارب ڈالر قرض لینے کا فیصلہ کیا ہے۔
خبر رساں چینلز نے وزارت خزانہ کے ذرائع کو بنیاد بنا کر کہا تھا کہ چین سے 3 ارب ڈالر کا قرض زرمبادلہ کے ذخائر مستحکم کرنے کے لیے ملے گا، جبکہ قازقستان اور روس سے ملنے والے 2 ارب ڈالر پاکستان ریلوے کے ایم ایل ون منصوبے پر خرچ ہوں گے۔
واضح رہے کہ وزیراعظم دورہ چین کیلئے 3 فروری کو روانہ ہوں گے جہاں سرمائی اولمپکس میں شرکت کے ساتھ ساتھ دیگر سربراہان مملکت سے ملاقاتیں شیڈول ہیں۔ اس حوالے سے چیئرمین سرمایہ کاری بورڈ اظفر احسن کا کہنا ہے کہ ہماری ترجیح براہ راست غیر ملکی سرمایہ کاری ہے۔
