مشہور انڈین ریئلیٹی شو بگ باس اور اس کے میزبان سلمان خان شو کے دوران اسلامو فوبیا کے واقعے پر شدید تنقید کی زد میں آگئے ہیں۔
خبررساں ادارے کی رپورٹ کے مطابق بگ باس شو کے دوران 2 شرکاء کے درمیان اسلاموفوبیا کا ایک واقعہ پیش آیا جس کی مذمت نہ کرنے پر پروگرام کے میزبان سلمان خان اور شو کو شدید تنقید کا نشانہ بنایا جارہا ہے۔
رپورٹ کے مطابق واقعہ کچھ اس طرح ہوا کہ شو کے دوران 2 شرکاء کی کپتانی کے معاملے میں آپس میں تکرار شروع ہوئی اسی دوران سمبا ناگپال نے عمر ریاض کو لفظی وار کے دوران "دہشت گرد" کہا اور انہیں دھکا دے کر سوئمنگ پول میں گرادیا۔
اس سین نے دنیا بھر میں موجود شو کے شائقین کو شدید مایوس کیا، اس سے زیادہ مایوسی لوگوں کو سلمان خان کی جانب سے اس واقعے کی مذمت کرنے کے بجائے اسے نظر انداز کرنے اور دیگر کم اہمیت والے معاملات پر بات کرنے پر ہوئی۔
صارفین نے ٹویٹر پر اس واقعے کے ویڈیو کلپ شیئر کرتے ہوئے شدید الفاظ میں مذمت کی،
صارفین نے سلمان خان اور پروگرام کو نشر کرنےو الے ٹی وی چینل کو خاموش رہنے پر بھی آڑے ہاتھوں لیا اور عمر ریاض کے ساتھ اپنی وفاداریوں سے متعلق پیغامات کی بھرمار کردی۔