اسلام آباد کے سیکٹر آئی 10 میں دن دیہاڑے ایک شخص نے راہ چلتی خاتون کو دبوچ کر ہراساں کیا، واقعہ کی ویڈیوسوشل میڈیا پر وائرل ہوگئی۔
مائیکروبلاگنگ ویب سائٹ ٹویٹر پر ایک ویڈیو سامنےآئی ہے جس میں ایک برقع پوش خاتون ایک سڑک پر سر جھکائے جاتی دکھائی دے رہی ہے کہ اچانک پیچھے سے ایک کالے کپڑو ں میں ملبوس شخص نےاسے دبوچ لیا۔
ہوس کے مارے اس شخص نے عورت کو پیچھے سے پکڑ کر غیر اخلاقی حرکت کی،عورت کی مزاحمت اور شور مچانے پر فورا فرار ہوگیا۔
صحافی احتشام علی عباسی نے ویڈیو شیئر کرتے ہوئے کہا ہے کہ جس خاتون کے ساتھ یہ واقعہ پیش آیا ہے انہوں نے خو د یہ ویڈیو مجھے سینڈ کی ہے، پولیس نے تاحال اس واقعہ پر کوئی ایکشن نہیں لیا ہے۔
انسانی حقوق کی رہنما ضوبیا خورشید نے بھی یہ ویڈیو شیئر کرکے اسلام آباد پولیس سے ایکشن کا مطالبہ کیا۔
اسلام آباد پولیس نے اس کے جواب میں ردعمل دیتے ہوئے کہا کہ پولیس ٹیم اس کیس پر کام کررہی ہے، متعلقہ ایس ایچ او خاتون سے رابطے میں ہے،جلدکارروائی عمل میں لائی جائےگی۔
