امریکی نشریاتی ادارے نے خواتین کو جنسی زیادتی کا نشانہ بنانے کے الزام پر معروف اداکار کو فارغ کردیا ہے۔ بین الاقومی میڈیا رپورٹس کے مطابق امریکی نشریاتی ادارے سی بی ایس نے متعدد فلموں اور ٹی وی پروگراموں میں اداکاری کے جوہر دکھانے والے مشہور ادکار کرس نوٹھ کو جنسی زیادتیوں کے الزامات کی زد میں آنے کے بعد اپنے شو سے فارغ کردیا ہے۔
رپورٹس کے مطابق کرس نوٹھ پر 2 مختلف خواتین نے جنسی طور پر استحصال و زیادتی کرنے کا الزام عائد کیا تھا، ایک خاتون نے اپنے انٹرویو کے دوران الزام عائد کیا کہ کرس نوٹھ نے 2004 میں امریکی ریاست لاس اینجلس میں انہیں جنسی زیادتی کا نشانہ بنایا ۔
دوسری خاتون نے انکشاف کیا کہ 2015 میں کرس نوٹھ نے انہیں جنسی طور پر ہراساں کیا اور ان سے اپنی جنسی خواہشات کو زبردستی پورا کیا۔ ان الزامات کے سامنے آنے کے بعد سی بی ایس نے کرس نوٹھ کو اپنے چینل کے شو "دی اکولائزر" سے فارغ کردیا اور فوری طور پر اس شو کی شوٹنگ روکنے کی ہدایات بھی جاری کردی ہیں۔
دی ایکولائزر کی اگلی قسط کے بعد کرس نوٹھ اس شو میں نظر نہیں آئیں گے، اگلی قسط میں جو شو نشر کیا جائے گا اس کی ریکارڈنگ اس فیصلے سے قبل ہوئی تھی۔ دوسری جانب کرس نوٹھ نے خود پر لگنے والے الزامات کو بے بنیاد ، جھوٹا اور من گھڑت قرار دیا اور کہا کہ ان خواتین کے ساتھ جنسی تعلقات ان کی مرضی کی بنیاد پر قائم ہوئے، اگر خواتین کی مرضی شامل نہ ہوتی تو میں ایک حد سے آگے نہ بڑھتا۔
