تحریک انصاف کی وفاق میں حکومت ختم ہوئی تو مبینہ غیر ملکی سازش کے خلاف "امپورٹڈ حکومت نامنظور" کا ہیش ٹیگ شروع ہوا جس نے تاریخ رقم کردی ہے۔
یہ ہیش ٹیگ پاکستان میں مسلسل نویں روز بھی ٹاپ ٹرینڈز میں شامل ہے۔ سوشل میڈیا کے ٹرینڈز کا تجزیہ کرنے والے ایک معروف پلیٹ فارم ٹوئٹ بائنڈر کے مطابق اس ٹرینڈ کے ساتھ 10 کروڑ 64 لاکھ سے زائد ٹوئٹ ہو چکے ہیں۔
ٹوئٹ بائنڈر سوشل میڈیا ٹرینڈز کے اعدادوشمار پر نظر رکھنے والا ایک مستند پلیٹ فارم ہے جس نے اپنے گلوبل آفیشل اکاؤنٹ سے جاری ایک پیغام میں بتایا کہ "امپورٹڈ حکومت نامنظور" کے ٹرینڈ کے ساتھ 10 کروڑ 64 لاکھ 33ہزار سے زائد ٹوئٹ کیے جا چکے ہیں۔
صارفین اس ہیش ٹیگ پر کھل کر اپنے جذبات کا اظہار کررہے ہیں جبکہ چیئرمین پی ٹی آئی اور سابق وزیراعظم عمران خان نے بھی اس ہیش ٹیگ میں حصہ لینے والوں کو سلام پیش کیا اور انہیں اپنا "کی بورڈ واریئر" قرار دیا ہے۔
اس ٹرینڈ کو پاکستان کی تاریخ کا سب سے بڑا سوشل میڈیا ٹرینڈ قرار دیا جارہا ہے۔ کیونکہ 9 روز گزرنے کے بعد بھی اس ٹرینڈ کو ہر سوشل میڈیا پلیٹ فارم پر استعمال کیا جا رہا ہے جس میں مبینہ غیر ملکی طاقت کی طرف سے پاکستان میں حکومت کی تبدیلی کی سازش کی بھرپور مذمت کی جا رہی ہے۔