وفاقی وزیر ریلوے و ہوا بازی خواجہ سعد رفیق افواہیں پھیلانے والوں پر برس پڑے اور کہا کہ اگر ملک دیوالیہ ہو جاتا تو روٹی اور ڈالر ایک ہزار روپے کے ہوتے۔
خواجہ سعد رفیق نے کہا کہ عدم اعتماد کی تحریک لاتے وقت ہمیں مشکلات کا اندازہ تھا، ہم نے اپنی سیاست داؤ پر لگا کر ریاست کو بچایا ہے۔ انہوں نے عمران خان کو مشورہ دیا کہ یہ وقت لڑنے کا نہیں بلکہ اسمبلی میں آؤ تاکہ ملکر کام کریں۔
ضلع قصور میں ورکرز کنونشن سے خطاب میں وفاقی وزیر نے کہا کہ ہم پوچھنا چاہتے ہیں اس معاشی تباہی کا ذمہ دار کون ہے، ملک پر 4 بار اعلانیا مارشل لا لگائے گئے اور پانچویں مرتبہ عمران خان کے ذریعے لگایا گیا جس پر کسی نے معافی مانگی اور نہ کسی کو سزا ملی۔
انہوں نے کہا ہم نے ڈالر 105 روپے پر چھوڑا تھا جسے عمران خان نے 180 روپے پر پہنچایا، ملک پر قرضوں کا بوجھ بڑہا دیا، تاہم حکومت عالمی مالیاتی ادارے کو بڑی مشکل سے واپس لائی، ملک کی قیادت کو بدنام کرنے کے لیے عمران خان کو لایا گیا، مسلم لیگ نے گردشی قرضے ختم کرکے اندھیروں کو اُجالے میں بدلا۔
وفاقی وزیر نے عمران خان کا چیلنج بھی کیا کہ ہمت ہے تو اسمبلیاں توڑ کر دکھائیں کیونکہ ہم اسمبلیاں تحلیل نہیں کریں گے، اسی لیے ہم ان کے خلاف عدم اعتماد لا رہے ہیں۔
