پاکستان تحریک انصاف کے رہنما اور سابق وزیراعلی پنجاب چوہدری پرویز الہیٰ کے صاحبزادے مونس الہیٰ نے دعویٰ کیا ہے کہ ایف آئی اے مجھے طلب کرکے کسی اور مقدمے میں گرفتار کرنا چاہتی ہے۔
مائیکروبلاگنگ ویب سائٹ پر مونس الہیٰ نے وفاقی تحقیقاتی ایجنسی(ایف آئی اے) کے اینٹی منی لانڈرنگ سرکل کی جانب سےجاری کردہ طلبی کے نوٹس کی نقل شیئر کرتے ہوئے کہا کہ آج میڈیا اور سوشل میڈیا سے پتہ چلا ہے کہ ایف آئی اے نے میری طلبی کا نوٹس نکالا ہے۔
پی ٹی آئی کے صدر چوہدری پرویز الہیٰ کے صاحبزادے نے مزید کہا کہ ایف آئی اے کسی اور کیس کی تفتیش میں یہ جاننا چاہتی ہے کہ نوٹس میں درج سوا پانچ کروڑ کی 8 ٹرانزیکشنز میرے اکاؤنٹ میں ڈپازٹ ہوئی ہیں، یہ رقم کسی اور اکاؤنٹ سے میر ے اکاؤنٹ میں ٹرانسفر نہیں کی گئی بلکہ ڈائریکٹ میرے اکاؤنٹ میں ڈیپازٹ ہوئی ہے۔
سابق وفاقی وزیر مونس الہیٰ نے کہا کہ میں نے یہ ٹرانزیکشنز اور متعلقہ رقم اس سال کے ٹیکس گوشواروں میں ڈکلیئر کی ہے، ایف آئی اے کو اتنی توفیق نہیں ہوئی کہ متعلقہ سالوں کا ٹیکس ریکارڈ ہی اٹھا کردیکھ لیں اور ایسے نوٹس نا نکالیں، درحقیقت نوٹس بھیجنے کا اصل مقصد مجھے طلب کرکے کسی اور کیس میں گرفتار کرنے کا ہے۔
خیال رہے کہ ایف آئی اےلاہور نے مونس الہیٰ کو پیر کے روز ذاتی حیثیت میں ٹمپل روڈ آفس میں پیش ہونے کا نوٹس جاری کردیا ہے، ایف آئی اے کے مطابق مونس الہیٰ کے بینک اکاؤنٹس میں 2021-22 کے دوران کروڑوں روپے کا اضافہ ہوا، ایف آئی اے مونس الہیٰ کے اکاؤنٹس میں جمع ہونےوالے کروڑوں روپے کی 8 ٹرانزیکشنز کی انکوائری کررہی ہے۔
