مسلم لیگ (ن) کے رہنما اور سابق وزیر اعظم شاہد خاقان عباسی نے تحریک عدم اعتماد سے متعلق منصوبہ بندی سے آگاہ کر دیا، انہوں نے کہا کہ سب سے پہلے عمران خان کے خلاف عدم اعتماد کی تحریک لائیں گے، پنجاب میں ابھی تحریک عدم اعتماد نہیں لا رہے، پنجاب حکومت تو ویسے ہی ختم ہو جائے گی۔
اے آر وائی نیوز کے پروگرام "سوال یہ ہے" میں گفتگو کرتے ہوئے شاہد خاقان عباسی نے کہا کہ سب سے پہلے تحریک عدم اعتماد وزیراعظم عمران خان کے خلاف آئے گی۔ انہوں نے اپوزیشن کی حکمت عملی سے متعلق کہا کہ اپوزیشن بھی عدم اعتماد سے پہلے جلسہ کرے گی۔
سابق وزیراعظم مزید کہا کہ امن و امان کا خیال رکھنا حکومت کا کام ہے، حکومت کی کوشش ہے کہ زیادہ سے زیادہ وقت لیا جائے، زیادہ وقت اس لیے لیا جا رہا ہے تا کہ اتحادیوں کو منالیں۔ میرے خیال میں ان کی اپوزیشن کے تمام ممبران پر بھی نظر ہونی چاہیے۔
انہوں نے کہا کہ عدم اعتماد کی کامیابی کے بعد طویل حکومت بنانے کا ارادہ نہیں، اس حکومت کوہٹا کر نئے انتخابات کی طرف جانا چاہیے۔ کہا کہ پنجاب میں اس وقت تحریک عدم اعتماد نہیں آ رہی، پنجاب میں عدم اعتماد آتا تو کسی کو وزارت اعلیٰ کی پیشکش کرتے، پنجاب میں تحریک عدم اعتماد آئے گی تو پھر دیکھیں گے، پنجاب حکومت تو ویسے ہی ختم ہو جائے گی کیونکہ ان کے ارکان ناراض ہیں۔
سابق وزیراعظم نے یہ بھی بتایا کہ تحریک ناکام ہوتی ہے تو سرپرائز ہوگا، تحریک عدم اعتماد کسی غیر آئینی عمل سے ہی ناکام ہوگی، تحریک عدم اعتماد ناکام ہوئی تو سڑکوں پر احتجاج کریں گے۔
