نجی ٹی وی چینل کے پروگرام میں جسٹس (ر) وجیہہ الدین نے وزیراعظم عمران خان پر مالی بدعنوانی پر مشتمل الزامات لگائے جن کے ردعمل میں شہباز گل نے وجیہہ الدین سے متعلق کہا کہ کیا یہ لوگ پاگل ہیں یا دوسرں کو پاگل سمجھتے ہیں۔ خان کو عزت الله نے دی ہے ایسے جھوٹوں سے کوئی فرق نہیں پڑتا۔
سماجی روابط کی ویب سائٹ ٹوئٹر پر جاری ایک بیان میں معاون خصوصی شہباز گل نے کہا کہ جسٹس وجیہ الدین کا چئیرمین تحریک انصاف عمران خان کے گھر کے خرچے سے منسلک بیان بالکل جھوٹا اور غیر منطقی بیان ہے۔
انہوں نے کہا کہ جو بھی عمران خان کو جانتا ہے وہ ان کی خود داری اور دیانت داری کو جانتا ہے۔ وجیہہ صاحب پارٹی سے ہٹائے جانے کے دکھ میں اکثر ایسے غیر منطقی بیان دیتے رہتے ہیں۔
معاون خصوصی نے ایک اور ٹوئٹ میں کہا کہ ایک طرف یہی لوگ جانتے ہیں اور کہتے ہیں کہ عمران خان چائے کے ساتھ بسکٹ نہیں دیتا اور دوسری طرف یہ بتا رہے ہیں کہ عمران خان کے گھر کا خرچہ 30 لاکھ تھا پھر 50 لاکھ ہو گیا۔
کیا یہ لوگ پاگل ہیں یا دوسرں کو پاگل سمجھتے ہیں۔ خان کو عزت الله نے دی ہے ایسے جھوٹوں سے کوئی فرق نہیں پڑتا۔
یاد رہے کہ جسٹس (ر) وجیہہ الدین نے ایک ٹی وی پروگرام میں کہا تھا کہ یہ مت سمجھیں کہ عمران خان ایک دیانت دار لیڈر ہیں ، ایک عرصہ تک جہانگیر ترین عمران خان کے کچن کے اخراجات اٹھاتے رہے ہیں۔
انہوں نے عمران خان پر الزام لگایا کہ وہ تو سالہا سال سے کبھی اپنا کچن بھی خود نہیں چلاتے، شروع میں جہانگیر ترین کے لوگ 30 لاکھ روپے ماہوار دیا کرتے تھے پھر کہا گیا کہ 30 لاکھ کم ہیں خرچ 50 لاکھ روپے کردیا جائے۔
انہوں نے مزید کہا کہ عمران خان کا انداز یہ تھا کہ گاڑی پیٹرول سے بھری ہونی چاہیے، جیب میں پیسہ چاہے نہ ہو ساتھ موجود لوگ پیسہ خرچ کرنے والے ہونے چاہیئں، وہ انسان جس کے جوتے کے تسمے تک اپنے نہیں ہیں وہ خود کو ایماندار کیسے کہہ سکتا ہے۔ مالی نوعیت کی بدعنوانیاں بھی بددیانتی کے زمرے میں ہی آتی ہیں، ایسے بہت سے لوگ اور ادارے تھے جو پارٹی میں فنڈنگ کیا کرتے تھےاور یہ پیسے بنی گالہ اور عمران خان کا گھر چلانے کیلئے آتے تھے یہ پارٹی فنڈ نہیں تھا۔