پشاور ہائی کورٹ ایبٹ آباد بینچ نے میں ہزارہ ڈویژن کے پانچ اضلاع کے لیے 20 جنوری کو جاری ہونے والا شیڈول کالعدم قرار دے دیا۔
تفصیلات کے مطابق پشاور ہائی کورٹ ایبٹ آباد بینچ نے 27 مارچ کو خیبر پختونخوا میں دوسرے مرحلے میں ہونے والے بلدیاتی انتخابات کو ملتوی کر دیا عدالت نے ہزارہ ڈویژن کے پانچ اضلاع کے لیے 20 جنوری کو جاری ہونے والا شیڈول کالعدم قرار دیا۔
عدالتی فیصلے میں کہا گیا ہے کہ دوسرے مرحلے کے بلدیاتی انتخابات برف باری سے متاثر ہونے کا خدشہ ہے جس کے باعث صاف اور شفاف انتخابات ممکن نہیں ہوسکتے۔عدالت نے الیکشن کمیشن آف پاکستان کو برفانی علاقوں میں رمضان کے بعد الیکشن منعقد کرنے کی ہدایت کردی۔
پانچ اضلاع کے جن علاقوں میں انتخابات ملتوی ہوئے ہیں ان میں ایبٹ آباد، مانسہرہ، بٹگرام، تورغر، اپر اور لوئر کوہستان، کولائی پلاس کوہستان، سوات، مالاکنڈ، شانگلہ، لوئر دیر، اپر دیر، چترال، اپر اور لوئر کرم، اورکزئی، شمالی وزیرستان اور جنوبی وزیرستان شامل ہیں۔
خیال رہے کہ ضلع کوہستان سے تعلق رکھنے والے دو شہریوں ملک اورنگزیب اور محمد اقبال نے درخواست دائر کی تھی۔ پشاور ہائی کورٹ ایبٹ آباد بینچ میں دائر ہونے والی درخواست میں کہا گیا تھا کہ برف باری اور دیگر مسائل کے باعث ہزارہ ڈویژن میں انتخابات ممکن نہیں ہیں۔
دوسری جانب صوبائی الیکشن کمیشن خیبرپختونخوا نے اس حوالے سے نوٹیفکیشن جاری کردیا ہے اور چیف الیکشن کمشنر سے رمضان کے بعد انتخابات شیڈول کرنے کی درخواست کر دی۔
