مسلم لیگ (ق) کے صدر چودھری شجاعت نے کہا ہے کہ ریاست کی محافظ فوج ہے جو جانتی ہے ملک کیسے سنبھالنا ہے، انہوں نے کہا سیاست میں نظریاتی اختلاف کو ذاتی دشمنی میں نہیں بدلنا چاہیے۔
چودھری شجاعت اور چودھری پرویز الہٰی سے سینئر صحافیوں نے ملاقات کی جس میں سابق وفاقی وزیر مونس الہٰی ودیگر رہنما بھی شریک تھے، دوران ملاقات چودھری شجاعت حسین نے کہا کہ ہمیں چاہیے آج ہم اپنی انا کی بھی قربانی دیں کیونکہ اسی طرح معاملات میں بہتری آئے گی۔
سابق وزیراعظم چودھری شجاعت کا کہنا تھا فوج ملک کی محافظ ہے اسے پتا ہے ملک کو کیسے سنبھالنا ہے، سیاست میں نظریاتی اختلاف کو ذاتی دشمنی میں نہیں بدلنا چاہیے سب کو چاہیے کہ ایک دوسرے پر الزامات لگانے کے بجائے عوام کا سوچیں۔
سربراہ ق لیگ نے کہا اگلے الیکشن میں گجرات شہر سے ایم پی اے کی ٹکٹ کا فیصلہ مونس الٰہی کریں گے وہ اس حلقے کے رکن قومی اسمبلی ہیں۔ جب کہ پرویز الہٰی نے کہا چوہدری شجاعت ہمارے بڑے ہیں اور خاندان کے فیصلے وہی کرتے ہیں۔
انہوں نے مزید کہا آئندہ کچھ سال میں سیاست کا نقشہ بدل جائے گا اور نئے چہرے سیاست کے میدان میں آئیں گے ، آئندہ الیکشن میں پی ٹی آئی کے ساتھ اتحاد کرکے لڑیں گے۔ دوسری جانب مونس الہٰی نے کہا چوہدری شجاعت اور چوہدری پرویز الہٰی نے سمجھا رکھا ہے کہ شریف خاندان کے لوگ پیٹھ میں چھرا گھونپتے ہیں ان پر اعتماد نہیں کرنا۔
جب کہ انہوں نے یہ بھی واضح کر دیا کہ وہ کوئی نئی سیاسی جماعت بنانے کا ارادہ نہیں رکھتے بلکہ مسلم لیگ ق ہی کے پلیٹ فارم سے الیکشن لڑیں گے۔
