سندھ بار کونسل کے آفس سیکرٹری ایڈووکیٹ عرفان مہر قتل کیس میں ملزم نے انکشاف کیا ہے کہ بہن کے اکسانے پر بہنوئی کو قتل کیا۔
تفصیلات کے مطابق کراچی کی انسداد دہشت گردی کی عدالت میں سندھ بار کونسل کے آفس سیکرٹری ایڈووکیٹ عرفان مہر قتل کیس کی سماعت ہوئی، دوران سماعت سی ٹی ڈی نے کیس میں گرفتار 2 ملزمان کو عدالت کے روبرو پیش کیا اور ان سے کی گئی ابتدائی تفتیش کی رپورٹ بھی جمع کروائی۔
تفتیشی رپورٹ کے مطابق سی ٹی ڈی حکام نے عرفان مہر قتل کیس میں 2 ملزمان غلام اکبر اور واجد حسین کو گرفتار کیا، غلام اکبر نے ابتدائی پوچھ گچھ کے دوران بتایا کہ بہن کے اکسانے پر بہنوئی کو قتل کیا، واردات کے بعد آلہ قتل ذوالفقار کے پاس رکھوایا جبکہ موٹر سائیکل ایک دوسرے دوست عابد کے پاس رکھوائی۔
عدالت نے ملزمان کو مزید تفتیش کیلئے10 روز کے جسمانی ریمانڈ پر کاؤنٹر ٹیررازم ڈیپارٹمنٹ کے حوالے کردیا ہے جبکہ پولیس نے مقتول کی بہن پر قتل کی منصوبہ بندی کرنے ، آلہ قتل اور شواہد چھپانے پر ذوالفقار کو بھی مقدمے میں ملزم نامز د کردیا ہے۔
عدالت نے 10 روز کے جسمانی ریمانڈ کے بعد 23 دسمبر کو مقدمے کی پیش رفت رپورٹ اور ملزمان کو عدالت کے روبرو پیش کرنے کا حکم جاری کرتے ہوئے سماعت ملتوی کردی ہے۔
