پاکستان تحریک انصاف کے رہنما فرخ حبیب نے لاہور کے حلقہ پی پی 168 میں ووٹوں کی مبینہ خریداری سے متعلق وائرل ویڈیو کے معاملے پر اپنا ردعمل دیدیا ہے۔
تفصیلات کے مطابق آج سوشل میڈیا پر ایک ویڈیو وائرل ہوئی جس میں پی پی 168 سے تحریک انصاف کے امیدوار نواز اعوان کیلئے ووٹوں کی مبینہ طور پر خریداری کرنے والے ملزم کے موبائل فون کی چیٹ دکھائی گئی تھی۔
اس موبائل فون میں نوا زاعوان کے نام سے سیو ایک نمبر پر مختلف ویڈیوز اور تفصیلات شیئر کی گئیں تھی جس میں شناختی کارڈز کے نمبرز اور شناختی کارڈ کی تصاویر شامل تھیں۔
رہنما تحریک انصاف فرخ حبیب نے اس ویڈیو اسکینڈل کے معاملے پر ردعمل دیتے ہوئے اپنے ویڈیو بیان میں کہا کہ اس چیٹ میں کوئی میرا نام یا میرا کردار سامنے آیا ہے؟ میں اس حلقے میں انتخابی مہم چلارہا ہوں، جس شخص کا نام لے کر مجھ پر الزام لگایا جارہا ہے اس کو تو خود ن لیگ والوں نے پکڑا ہوا ہے۔
فرخ حبیب نے کہا کہ بندے کو پکڑ کر اس موبائل سے ویڈیوز اور واٹس ایپ چیٹس سامنے آجاتی ہیں، کوئی اچھا منصوبہ بنانا چاہیے تھا، کوئی اچھی پلاننگ کرلینی تھی، آپ خود یہ ڈرامہ کررہے ہیں، جس میں کوئی حقیقت نہیں ہے۔
انہوں نے مزید کہا کہ جس شخص کا حوالہ دیا جارہا ہے اس سے جون کے آخری ہفتے میں انتخابی مہم کے دوران میری ایک بار ملاقات ہوئی ہے، میں نے اسے کوئی ہدایات نہیں دی،یہ ایسا ہی ہے کہ کسی شخص کے ساتھ آپ کی واٹس ایپ پر بات چیت ہو اور وہ شخص کچھ عرصے بعد قتل کرکے تصاویر آپ کو بھیج دے یاکوئی مجبور کرکے بھجوادے تو اس کا مطلب یہ تو نہیں کہ آپ اس قتل میں ملوث ہیں۔
رہنما تحریک انصاف نے چیلنج کرتے ہوئے کہا کہ اگر اس شخص نے لوگوں کے ووٹوں کی خریداری میری ہدایات پر کی ہیں تو آپ کوئی ایک ثبوت دکھادیں ، میرا کوئی میسج، وائس نوٹ یا ہدایات نامہ دکھادیں ۔