خبررساں ادارے کی رپورٹ کے مطابق افغان وزیر دفاع ملا محمد یعقوب نے اپنے ایک بیان میں یہ اشارہ دیتے ہوئے کہا ہے کہ ہمیں بھارت کے ساتھ دفاعی تعلقات رکھنے میں کوئی مسئلہ نہیں ہے۔
انہوں نے یہ بیان بھارتی ٹی وی چینل کو انٹرویو دیتے ہوئے دیا اور کہا کہ دونوں ملکوں کے درمیان پہلے سفارتی تعلقات بحال ہونے چاہیے، بھارت افغان تعلقات معمول پر آجائیں تو افغان فورسز کو ٹریننگ کیلئے بھارت بھیجنے کیلئے تیار ہیں۔
ملا یعقوب نے بھارتی حکومت کو کابل میں اپنا سفارت خانہ دوبارہ کھولنے اور نئی دہلی میں افغان سفارت خانے کو فعال کرکے افغان سفیر کو تعینات کرنے کی اجازت کا بھی مطالبہ کیا اور کہا کہ اگر بھارت افغانستان میں اپنا سفارتی عملہ بھیجنے کیلئے تیار ہے تو ہم انہیں ہر قسم کی حفاظتی ضمانت دینے کیلئے تیار ہیں۔
افغان وزیر دفاع نے کہا کہ ہم بھارت سمیت دنیا کے تمام ملکوں کے ساتھ اچھے تعلقات کے خواہاں ہیں، ہم افغانستان کی سرزمین کو بھارت یا پاکستان کی جانب سے ایک دوسرے کے خلاف استعمال کرنے کی ہرگز اجازت نہیں دیں گے، دونوں ملکوں کو اپنے اختلافات ختم کرنے کیلئے بات چیت کا راستہ اپنانا ہوگا۔
پاکستان کے ساتھ تعلقات کے حوالے سے ایک سوال کے جواب میں انہوں نے کہا کہ پاکستان کے ساتھ اچھے تعلقات ہیں بارڈر پر ہونے والے چند ایک واقعات کو ہرگز سنجیدہ نہیں لینا چاہیے۔
واضح رہے کہ افغان وزیر دفاع کی جانب سے یہ اہم بیان ایسے وقت میں سامنے آیا جب بھارتی سیکرٹری خارجہ جی پی سنگھ ایک وفد کے ہمراہ دورہ افغانستان پر ہیں۔
