مسلم لیگ ن کے رہنما مفتاح اسماعیل بھی تحریک انصاف حکومت کے متعارف کروائے گئے روشن ڈیجیٹل اکاؤنٹس پروگرام کے گن گانے لگے ہیں۔
تفصیلات کے مطابق مائیکروبلاگنگ ویب سائٹ ٹویٹر پر اسٹیٹ بینک آف پاکستان نے روشن ڈیجیٹل اکاؤنٹس میں ترسیلات زر بھیج کر اس پروگرام کا کامیاب بنانےوالے اوور سیز پاکستانیوں کو شکریہ ادا کیا اور انہیں خراج تحسین پیش کرنے کیلئے ایک پیغام شیئر کیا۔
اسٹیٹ بینک کے جاری کردہ ویڈیو پیغام میں کہا گیا ہے کہ اپنے وطن کی ترقی کیلئے بیرون ملک مقیم پاکستانیوں کی جذبہ حب الوطنی کا شکریہ، جنہوں نے تھوڑے عرصے میں اسٹیٹ بینک کی خصوصی پیشکش روشن ڈیجیٹل اکاؤنٹ کو شاندار کامیابی سے ہمکنار کروایا۔
اسٹیٹ بینک کی جانب سے اس بیان کو ری ٹویٹ کرتے ہوئے ن لیگ کے سابق وزیر خزانہ مفتاح اسماعیل نے اپنے ٹویٹر بیان میں کہا کہ روشن ڈیجیٹل اکاؤنٹ ایک ایسا منصوبہ ہے جو تارکین وطن کو پرکشش شرائط پر اپنے وطن میں سرمایہ کاری کی سہولت فراہم کرتا ہے۔
انہوں نے کہا کہ اس پروگرام میں بہت سی بہترین سہولیات فراہم کی جارہی ہیں جبکہ اسٹیٹ بینک ان میں مزید توسیع کا منصوبہ بھی بنارہی ہے، ہماری حکومت روشن ڈیجیٹل اکاؤنٹس کو مکمل طور پر سپورٹ کرنے کا عزم رکھتی ہے۔
واضح رہے کہ روشن ڈیجیٹل اکاؤنٹس سابق وزیراعظم عمران خان کے خصوصی منصوبوں میں سے ایک ہے جس کی کامیابی بیرون ملک مقیم پاکستانیوں کے ان پر اعتماد کا کھلا ثبوت ہے، تاہم عمران خان کی حکومت کے جانےکے بعد خبریں گردش کررہی ہیں کہ اوورسیز پاکستانیوں نے روشن ڈیجیٹل اکاؤنٹس کے ذریعے پاکستان میں سرمایہ کاری سے انکار کردیا ہے۔