تحریک انصاف کے رہنما شہباز گل کا کہنا ہے کھویا ہوا سائفر آپکو چیف جسٹس صاحب سے ملے گا۔
شہباز گل نے اپنے آفیشل اکاونٹ سے ٹوئٹ کرتے ہوئے لکھا کہ ن لیگ والوں کا سائفر کھو گیا۔ ان کو انگریزی پڑھنی نہیں آتی۔ وہی سائفر وزیراعظم نے اسپیکر کو بھیجا تھا اور اسپیکر نے چیف جسٹس سپریم کورٹ کو۔ تو آپ کا کھویا ہوا سائفر آپ کو چیف جسٹس صاحب سے ملے گا۔
یاد رہے کہ گزشتہ روز ڈپلومیٹک سائفر کی کاپی سے متعلق آڈیوز کی تحقیقات کیلئے کابینہ کی خصوصی کمیٹی تشکیل دینے کا فیصلہ کیا گیا ہے، فیصلہ وزیراعظم شہبازشریف کی زیرصدارت وفاقی کابینہ اجلاس میں کیا گیا۔
اجلاس میں انکشاف ہوا کہ سفارتی سائفر کی کاپی وزیراعظم ہاؤس کے ریکارڈ سے غائب ہے۔ جاری کردہ اعلامیے میں کہا گیا ہے کہ ڈپلومیٹک سائفر کی کاپی سے متعلق آڈیوز نے عمران خان کی مجرمانہ سازش بے نقاب کردی۔
کابینہ نے کہا کہ ڈپلومیٹک سائفر کی کاپی کو من گھڑت معانی دے کر سیاسی مفادات کی خاطر قومی مفادات کا قتل کیا گیا، فراڈ، جعلسازی اور فیبریکیشن کے بعد اسے چوری کرلیا گیا، یہ آئینی حلف و دیگر قوانین اور آفیشل سیکرٹ ایکٹ کی خلاف ورزی ہے، یہ ریاست کے خلاف ناقابل معافی جرم کا ارتکاب ہے۔
اعلامیے کے تحت وفاقی کابینہ اجلاس میں کہا گیا اس سارے معاملے کی باریک بینی سے چھان بین کی جائے، ذمہ داروں کا تعین کرکے انہیں قانون کے مطابق کڑی سزا دی جائے۔
