مسلم لیگ ن کےسینئر رہنماخواجہ محمد آصف نے حکومت کے خلاف عدم اعتماد کی تحریک میں بیوروکریسی اور پولیس کو غیر جانبدار رہنے کی وارننگ دیدی ہے۔
مائیکروبلاگنگ ویب سائٹ ٹویٹر پر اپنے پیغام میں ن لیگی رہنما نے کہا کہ متحدہ اپوزیشن تحریک عدم اعتماد کے ذریعہ آئینی تبدیلی کاراستہ اختیار کر رہی ہے جس کا مقصد صرف و صرف آئین و قانون کی حکمرانی قائم کرنا ہے۔
انہوں نے مزید کہا کہ اگر سول بیوروکریسی اورپولیس نے اس آئینی عمل کو سبوتاژ کرنے کی کوشش کی تو آئین کی آرٹیکل 6 واضع ہے۔ خواجہ آصف نے کہا کہ ہم وعدہ کرتے ہیں کہ اس پر عمل ضرور ہو گا. انشاء اللہ۔
لیگی رہنما خواجہ سعد رفیق نے بھی سرکاری افسران کو خبر دار کیا کہجو بھی آئینی راستے میں رکاوٹ بنا آرٹیکل 6 بھگتے گا سپیکر ھو یا کوئی سرکاری افسر۔
واضح رہے کہ اپوزیشن کی جماعتوں نے حکومت کے خلاف قومی اسمبلی میں تحریک عدم اعتماد جمع کروائی ہوئی ہے جس پر جلد قومی اسمبلی کا اجلاس بلائے جانے کا امکان ہے۔
ایسے میں اپوزیشن کی جانب سے الزامات سامنے آرہے ہیں کہ حکومت اپوزیشن اراکین کو گرفتار کرنے کی منصوبہ بندی کررہی ہے تاکہ اپوزیشن عدم اعتماد کو کامیاب بنانے کیلئے اسمبلی میں تعداد پوری نہ کرسکے۔